६ असार, विराटनगर । सरकारले संसदमा दर्ता गराएको मिडिया काउन्सिल विधेयकसहित प्रेस स्वतन्त्रताविरोधी कानुन खारेज गर्न माग गर्दै विराटनगरमा संकलन गरिएको हस्ताक्षर प्रमुख जिल्ला अधिकारी मार्फत प्रधानमन्त्री केपीशर्मा ओलीलाई पठाइएको छ ।
नेपाल पत्रकार महासंघ मोरङमा आवद्ध पत्रकारहरुले प्रमुख जिल्ला अधिकारी मार्फत प्रधानमन्त्रीलाई संकलन गरिएको हस्ताक्षर बुझाइएका हुन । मोरङ शाखाका अध्यक्ष बन्धु पोखरेल लगायतका सहभागीहरुले प्रमुख जिल्ला अधिकारी रमेश केसीलाई संकलित हस्ताक्षर बुझाएको हो । सरकारले बैशाख २६ गते संसदमा दर्ता गराएको मिडिया काउन्सिल विधेयक प्रेस स्वतन्त्रता विरोधी रहेको विश्लेषण गर्दै आन्दोलित भएका देशभरका पत्रकारहरुले त्यसयता दुई चरणको आन्दोलनको कार्यक्रम गरिसकेका छन् ।
महासंघको केन्द्रीय सर्कुलर अनुसार तेश्रो चरणको आन्दोलनका कार्यक्रम अन्तर्गत मिडिया काउन्सिल विधेयक फिर्ता लिन तथा प्रेस स्वतन्त्रता विरोधी कानुनहरु खारेज गर्न हस्ताक्षर संकलन गरी प्रमुख जिल्ला अधिकारीलाई बुझाइएको नेपाल पत्रकार महासंघ मोरङ शाखाका अध्यक्ष बन्धु पोखरेलले बताए । गत असार ३ गते मोरङ शाखाले प्रेस स्वतन्त्रताविरोधी कानुन खारेज गर्न माग गर्दै विराटनगरमा हस्ताक्षर संकलन गरेको थियो ।
