१४ असार, काठमाडौँ ।
प्रदेश १ सरकारले रातो किताब मोटो पार्न जथाभावी योजना समावेश गरेको र १० हजार रुपैयाँ राखेर पनि बजेट छुट्याएको भन्दै सांसदहरुले आलोचना गरेका छन् । १ नम्बर प्रदेशसभामा सरकारले प्रस्तुत गरेको विनियोजन विधेयक माथिको छलफलका क्रममा भाग लिने सांसदहरुले सरकारले रातो किताब मोटो पार्न जथाभावी योजना समावेश गरेको र १० हजार रुपैयाँ राखेर पनि बजेट छुट्याएको भन्दै आलोचना गरेका हुन् ।
यस्तै सांसद प्रतापप्रकाश हाङमाङले ताप्लेजुङमा मात्रै १० हजार रुपैयाँ बजेट छुट्याएका योजना १० वटा भएको भन्दै त्यस्तो कसरी भएको भन्ने प्रश्न गरे ? उनले न्यूनतम बजेट विनियोजन गर्दा प्रदेश सरकारले १० लाख भन्दा कमका छुट्याउनु नहुनेमा जोड दिए ।
संसदमा बोल्दै सांसद विष्णुमाया तुम्बाहाम्फेले रातो किताबबाट आफू निराश भएको बताइन् । बजेट र योजनाहरुले सुखी र समुन्नत प्रदेश निर्माणका साथै समाजवाद उन्मुख समाज तयार पार्ने भनिएको भएपनि त्यो लक्ष्य हासिल हुने खालको भने नरहेको उनले बताइन् ।
यस्तै सांसद लोकप्रसाद संग्रौलाले रातो किताब महाभारतकै साइजमा निकालिएको भएपनि प्रदेशलाई गौरव गर्ने खालका कुनै पनि काम नदेखिएको बताए । उनले प्रदेशका मुख्यमन्त्री तथा मन्त्रीहरुले आफ्नो नेतृत्वको क्षमता देखाउन नसकेको आरोप लगाए ।
छलफलका क्रममा सांसदहरुले राखेका प्रश्नको जवाफ दिँदै मुख्यमन्त्री शेरधन राईले भने १० हजार रुपैयाँ राखेका झण्डै १ हजार योजना रातो किताबमा रहेको बताए । त्यसो गर्नुको कारण सबै सांसदहरुको माग सम्बोधन गर्नु भएको र आगामी वर्षमा आवश्यकता र औचित्यका आधारमा बजेट छुट्याउने बताए ।
प्रदेशसभा बैठकमा विनियोजन विधेयकमा राखिएका मुख्यमन्त्री, भौतिक पूर्वाधार विकास मन्त्रालय र भूमि व्यवस्था कृषि तथा सहकारी मन्त्रालयसँग सम्बन्धीत शीर्षकमाथिको छलफल सकिएको छ । प्रदेशसभाको अर्को बैठक आइतबार दिउँसो १ बजे बस्नेछ ।
