एजेन्सी, असार १४
चीन र अमेरिका आर्थिक तथा व्यापार वार्ता शुरु गर्न सहमत भएका छन् । जापानको ओसाकामा शनिबार भएको भेटमा दुवै देशका राष्ट्र प्रमुखबीच यो सहमति भएको हो ।
जी–२० सम्मेलनको क्रममा भएको सो वार्तामा चिनियाँ राष्ट्रपति सी जिनफिङ र उनका समकक्षी डोनाल्ड ट्रम्पबीच समानता र पारस्परिक सम्मानको आधारमा आर्थिक तथा व्यापारिक परामर्श फेरि सुरु गर्ने सहमति भएको चिनियाँ समाचार एजेन्सी सिन्हुवाले जनाएको छ ।
अमेरिकाले चिनियाँ सामान निर्यातमा नयाँ कर लगाउने छैन । साथै दुवै देशका टोलीबीच आर्थिक र व्यापारिक विषयका विशिष्ट मुद्दामा वार्तासमेत हुने छ ।
भेटवार्ताको सुरुवातमा चिनियाँ राष्ट्रपति सीले भने, ‘विगत ४० वर्षको अवधिमा भएका धेरै महत्वपूर्ण परिवर्तनका बाबजुद चीन र अमेरिकाको सम्बन्ध र अन्तर्राष्ट्रिय परिस्थिति नयाँ स्थान पुगेको छ । तर एउटा सत्य के हो भने चीन र अमेरिका दुवै सहयोगबाट लाभान्वित हुन्छन् र संघर्षमा हार्छन् ।’
सीले ट्रम्पसँग भनेको भनाई उद्धृत गर्दै सिन्हुवाले लेखेको छ ‘टकरावभन्दा राम्रो सहयोग र वार्ता हो ।’’
चिनियाँ राष्ट्रपति सीसँग महान बैठक : राष्ट्रपति ट्रम्प
यसैबीच अमेरिकी राष्ट्रपति ट्रम्पले चिनियाँ राष्ट्रपति सीसँग महान बैठक भएको प्रतिक्रिया दिएका छन् । उनले चीनबाट अमेरिकाले खरिद गर्ने कृषि उत्पादनको सूची चीनलाई उपलब्ध गराउने जानकारी पनि दिएका छन् ।
उनले अमेरिकी कम्पनीहरुले हुवावेलाई सामान बेच्न निरन्तरता दिनुपर्ने पनि बताएको रोयटर्सले लेखेको छ ।
