विराटनगर, माघ १६
मुलुकमा प्रजातन्त्र स्थापनाका लागि जीवन उत्सर्ग गरेका सहिदहरुको सम्झनामा आज मुलुकभर सहिद दिवस मनाइदैछ । प्रजातन्त्र स्थापनाका लागि विक्रम सम्वत् १९९७ मा शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठले आफ्नो प्राणको आहुति दिएको सम्झनामा आज मुलुकभर विभिन्न कार्यक्रम गरी सहिद दिवस मनाइएको हो ।
सहिद दिवस अर्थात् सहिद सप्ताहको अन्तिम दिन आज काठमाडौको लैनचौरस्थित सहिद स्मारकमा विशेष कार्यक्रम गरिएको छ । प्रधानमन्त्री शेरबहादुर देउवाले सहिद स्मारकमा माल्यार्पण गरेर सहिदहरुप्रति सम्मान प्रकट गर्नुभयो ।
सो अवसरमा नेपाली सेनाले सहिद सलामी अर्पण गरेको थियो । सहिद दिवसको अवसरमा आयोजित विशेष समारोहमा सरकारका मन्त्रीहरु, उच्च पदस्थ अधिकारीहरु, सुरक्षा निकायका प्रमुखहरु पनि सहिद स्मारक पुगेका थिए ।
प्रधानसेनापति राजेन्द्र क्षेत्री, प्रहरी महानिरीक्षक प्रकाश अर्याल, शसस्त्र प्रहरी बलका प्रमुख सिंहबहादुर श्रेष्ठ, राष्ट्रिय अनुसन्धान विभागका प्रमुख दिलिप रेग्मीलगायतले सहिद स्मारकमा माल्र्यापण गरि सहिदहरुको सम्झना गरेका छन् ।
यस अघि सुरक्षा निकायको व्याण्ड टोलीका साथ शान्तिबाटीका बाट र्याली निकालिएको थियो । चार सहिद लगायत ज्ञात अज्ञात अन्य व्यक्तिहरुको बलिदानबाट २००७ सालमा नेपालमा १ सय ४ वर्षे लामो राणा शासन अन्त्य भइ प्रजातन्त्रको स्थापना भएको थियो ।
प्रजातन्त्र स्थापनामा योगदान पुर्याएका सहिदहरुको सम्झनामा हरेक वर्ष माघ १० गतेदेखि १६ गतेसम्मलाई सहिद सप्ताहको रुपमा मनाउने गरिएको छ ।
