२८ असार, विराटनगर ।
विराटनगरस्थित सिंघीया खोलाको जलस्तर घटेको छ । एकसाता यता लगातार भएको बर्षाको पानीका कारण खोलाको जलस्तर बढ्दै गएर बाढीको रुप लिएको थियो ।
बिहीबार बिहानबाट बढ्दै गएको खोलाको जलस्तर सांझ सम्म बाढीकोरुप लिएको थियो । बिहीबारदेखि बढेको खोलाको जलस्तर शुक्रबार सांझ ५ बजेबाट घटदै गएको छ । अहिलेपनि खोलामा बाढी रहेपनि खोला किनारका सुकुम्बासी बस्तीमा पसेको पानी निस्किएको छ ।
बस्तीबाट पानी निस्किएपनि सुकुम्बासीहरु भने घर फर्किन सकेका छैनन् । बादल लागि रहेकाका कारण फेरी पनि पानी पर्ने सम्भावना रहेकाले खोलामा बाढी आउने आशंकामा सुकुम्बासीहरु घर फर्किन नसकेका हुुन् । बाढीको पानी निस्किएपछि कयौ सुकुम्बासी परिवारका घरहरु भत्किएका छन् ।
माटोबाट लिपपोत गरेर बनाइएका कच्ची घरहरु भत्किएका हुन् । बाढी आएको बेला घरभित्रका सामान निकाल्न नभ्याएका कारण घर भित्रका अधिकांश सरसामान बगेर गएको पीडितहरुले जानकारी दिएका छन् । बाढी पीडितहरु खोला किनारको डिलमा पाल टांगेर बसेका छन ।
