११ कात्तिक, एजेन्सी ।
इस्लामिक बिद्रोही संगठन इस्लामिक स्टेट (आइएस) का प्रमुख अबु बक्र अल–बग्दादी मारिएको अमेरिकी राष्ट्रपति डोनाल्ड ट्रम्पले दाबी गरेका छन् ।
अमेरिकी सैनिकले सिरियाको उत्तर पश्चिमी क्षेत्रमा गरेको कारवाही अभियानको क्रममा अल–बग्दादीले जोगिने कुनै विकल्प नदेखेपछि आत्महत्या गरेको ट्रम्पले दाबी गरेका हुन् ।
राष्ट्रपति कार्यालय ह्वाइट हाउसबाट घटनाबारे जानकारी दिँदै ट्रम्पले आइएसका प्रमुख नेता मारिएको बताएका छन् । ट्रम्पका अनुसार अल–बग्दादी सुरुङ्गमा पशेपछि अमेरिकी सैनिकका कुकुरबाट घेरिए । त्यसपछि उनले आफूले लगाएको बमयुक्त ज्याकेट बिस्फोट गराएको ट्रम्पले बताएका छन् ।
अल–बग्दादी सन् २०१४ देखि चर्चामा आएका हुन् । उनले इराक र सिरियामा इस्लामिक राज्य बनाउने घोषणासहित हिंसात्मक आन्दोलन थालेका थिए । आइएसले गरेका आक्रमणका कारण हजारौँको ज्यान गएको छ ।
उत्तरी सिरियाबाट अमेरिकी सैनिक फिर्ता बोलाउने निर्णय गरेकोमा तीव्र आलोचना भइरहेका बेला अल–बग्दादीको मृत्यु ट्रम्पका लागि ठूलो जित हो ।
