१५ कात्तिक, एजेन्सी ।
इस्लामिक स्टेट (आईएस) ले नयाँ उत्तराधिकारी घोषणा गरेको छ ।
आफ्ना नेता अबु बकर अल–बग्दादी मारिएको पुष्टि गर्दै उसले उत्तराधिकारी घोषणा गरेको हो । आईएसद्वारा सार्वजनिक एउटा अडिओ टेपमा अबु इब्राहिम अल–हाशेमी अल–कुरैशी नयाँ नेता घोषित गरिएको बीबीसीले उल्लेख गरेको छ ।
उक्त अडियो टेपमा समूहका प्रवक्ता अबु अल–हसन अल–मुजाहिर पनि मारिएको पुष्टि गरेको छ । अमेरिकी विशेष फौजको कारबाहीमा अक्टोबर २७ तारिखमा बग्दादी सिरियामा मारिएको आईएसले पुष्टि गरेको हो ।
आईएसले आफ्ना नयाँ नेताबारे विस्तृत विवरण सार्वजनिक गरेको छैन । उनको कुनै तस्बिर पनि सार्वजनिक गरेको छैन । तर उसले आफ्ना नयाँ नेता पश्चिमाहरूविरुद्ध लडाइँ गरेका एक अनुभवी जिहादी लडाकु भएको दाबी गरेको छ ।
