काठमाडौं, फागुन २७
सत्तारुढ एमाले र माओवादी केन्द्रले प्रधानमन्त्रीको विश्वासको मतको पक्षमा मतदान गर्न ह्वीप जारी गरेका छन । प्रधानमन्त्री एवम् नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालले एमाले माओवादीको संयुक्त संसदीय दलको बैठकमा प्रधानमन्त्रीको विश्वासको मतको पक्षमा मतदान गर्न ह्वीप जारी गरेका हुन् ।
अहिले प्रधानमन्त्री केपी शर्मा ओलीले प्रतिनिधिसभामा विश्वासको मत लिँदै छन् । त्यस अघि प्रधानमन्त्री ओली र माओवादी केन्द्रका अध्यक्ष दाहालले दुवै पार्टीका प्रतिनिधिसभाका सांसदहरुलाई विश्वासको मत दिन ह्वीप जारी गरे ।
दुवै नेताले सरकारको कामलाई प्रभावकारी बनाउन आफ्नो सम्पूर्ण ध्यान केन्द्रित गर्न पनि सांसदहरुलाई सचेत गराए । प्रधानमन्त्री नियुक्त भएको ३० दिन भित्र प्रधानमन्त्रीले प्रतिनिधिसभामा विश्वासको मत लिनुपर्ने संवैधानिक व्यवस्था छ ।
सोही अनुसार प्रधानमन्त्री अोलीले आज विश्वासको मत लिन लागेका हुन् । प्रधानमन्त्री ओलीको पक्षमा दूई तिहाई बढि मत हुने स्पष्ट देखिन्छ ।
राष्ट्रिय जनता पार्टी, नेपाल, संघीय समाजवादी फोरम, नेपाल र राष्ट्रिय प्रजातन्त्र पार्टीले समेत प्रधानमन्त्री ओलीको पक्षमा मतदान गर्ने भएपछि प्रधानमन्त्री ओलीले २ तिहाई भन्दा बढि सांसदको विश्वासको मत पाउनेछन् ।
ओलीलाई बामगठबन्धनको तर्फबाट गत फागुन ३ गते राष्ट्रपति विद्या भण्डारीले प्रधानमन्त्रीमा नियुक्त गरेकी थिइन् । प्रतिनिधिसभामा २ सय ७५ जना सांसद मध्ये एमाले र माओवादी केन्द्रसँग मात्रै १ सय ७४ जना सांसद रहेका छन ।
त्यसमा राष्ट्रिय जनता पार्टी, नेपालको १७, संघीय समाजवादी फोरम, नेपालको १६ र राष्ट्रिय प्रजातन्त्र पार्टीको १ मत रहेको छ ।
