एजेन्सी, पुस २५
अष्ट्रेलियामा जारी बिग ब्यास लिगमा कप्तान ग्लेन म्याक्सवेलले उत्कृष्ट ब्याटिङ गरेपछि सन्दीप सम्मिलित मेलबर्न स्टार्सले मेलबर्न रेनेगेड्सलाई ७ विकेटले पराजित गरेको छ । रेनेगेड्सले पस्तुत गरेको १ सय ६९ रनको लक्ष्य स्टार्सले १८.४ ओभरमा ३ विकेट गुमाउँदै पुरा गर्यो । यो जारी बिग ब्यासमा मेलबर्न स्टार्सको सातौं जित हो ।
मेलबर्न स्टार्सको सहज जितमा कप्तान ग्लेन म्याक्सवेल ४५ बलमा १ चौका र ७ छक्का सहित ८३ रनमा अविजित रहे । निक लरकिन २८ बलमा १ चौका र १ छक्का सहित ३३ रनमा अविजित रहे । चौथो विकेटका लागि निक लरकिन र ग्लेन म्याक्सवेलले १ सय १५ रनको अविजित शतकीय साझेदारी गर्दै सहज जित पक्का गरे । ओपनर मार्कस स्टोइन शुन्यमा आउट हुँदा हिल्टन कार्टराइटले २१ बलमा ४ चौका र १ छक्का सहित ३५ रनको योगदान दिए । बेन डंक १४ रनमा आउट भए ।
त्यसअघि टस हारेर ब्याटिङ थालेको मेलबर्न रेनेगेड्सले २० ओभरमा ७ विकेट गुमाउँदै १ सय ६८ रन बनाएको थियो ।
रेनेगेड्सका शन मार्शले सर्वाधिक ६३ रनको योगदान दिए । सन्दीपले १४ औं ओभरको तेस्रो बलमा कट एण्ड बोल्ड आउट गर्नुअघि मार्शले ४३ बलमा ७ चौका र २ छक्का प्रहार गरे । मार्कस हरिस ३२ बलमा ३ चौका र २ छक्का प्रहार गर्दै ४२ रनमा रन आउट भए ।
पहिलो विकेटका लागि मार्श र हरिसले १०.३ ओभरमा ८६ रनको साझेदारी गर्दै राम्रो सुरुवात दिलाएका थिए । बेयू वेबस्टर २५, डानियल क्रिस्टियन १२ र टम कपुर १५ रनमा आउट भए । सन्दीप लामिछानेले ४ ओभरमा ३९ रन खर्चिदै २ विकेट लिए । नाथन कुल्टर नाइलले २ र हरिस रउफले १ विकेट लिए ।
तेस्रो आभर बलिङ गर्न आएका सन्दीपले १४ औं ओभरको तेस्रो बलमा आफैं क्याच लिदै मार्शलाई ६३ रनमा पेभिलिएन फर्काए । त्यस्तै १७ औं ओभरको पहिलो बलमै सन्दीपले वेबस्टरलाई सेब गोचबाट क्याच गराए ।
जारी बिग ब्यासमा मेलबर्न स्टार्स ८ खेलमा ७ मा जित र १ मा १४ अंक सहित शीर्ष स्थानमा छ । ८ खेल मा ८ खेल नै हारेको रेनेगेड्स पुछारमा छ । मेलबर्न स्टारले सिड्नी सिक्सर्ससँग आईतबार खेल्ने छ ।
