५ माघ, काठमाडौं ।
गायिका आस्था राउतलाई पक्राउ गर्न प्रहरीले अनुमति पाएको छ । आईतबार जिल्ला प्रशासन कार्यालय काठमाडौंले राउतलाई पक्राउ गर्न प्रहरीले अनुमति दिएको हो ।
प्रहरीले बुझाएको अनुसन्धान प्रतिवेदनका आधारमा अभद्र व्यवहार सम्बन्धी कसुरमा राउतविरुद्ध पक्राउ अनुमति जारी भएको स्रोतले बतायो । योसँगै राउत प्रहरीको सूचीमा फरार अभियुक्त बनेकी छन् ।
बधुबार काठमाडौं–भद्रपुर उडानका लागि त्रिभुवन अन्तर्राष्ट्रिय विमानस्थलमा नियमित सुरक्षा जाँचका क्रममा प्रहरीबाट दुव्र्यवहार भएको भन्दै राउतले भिडियो सन्देश जारी गरेकी थिइन् ।
भिडियो भाइरल भएपछि प्रहरी प्रधान कार्यालय, नक्सालले अनुसन्धानका लागि महानगरीय प्रहरी आयुक्तको कार्यालय, रानीपोखरीलाई निर्देशन दिएको थियो । त्यसपछि रानीपोखरीबाट विमानस्थलमा भएको घटनाबारे छानबिन सुरु भएको थियो ।
त्यसक्रममा संकलन गरिएको फुटेजबाट आस्थामाथि दुव्र्यवहार नभइ, उनले चाहिँ महिला प्रहरी रमिला श्रेष्ठलाई अभद्र व्यवहार गरेको देखिएको प्रहरी दाबी छ । त्यसपछि श्रेष्ठले पनि अभद्र व्यवहार सम्बन्धी कसुरमा कारबाहीको माग गर्दै विमानस्थल सुरक्षा प्रहरी कार्यालयमार्फत किटानी जोहरी दिएकी थिइन् ।
