१९ फागुन, काठमाडौं । सम्भावित कोरोनाभाइरसको संक्रमण जोखिमलाई ध्यानमा राख्दै नेपालले आइतबारबाट नेपाल आउने सबै हवाईयात्रुमाथि निगरानी सुरू गरेको छ । जसअनुसार हवाईयात्राबाट नेपाल आउने हरेक यात्रुको शरिरको तापमान मापन गरिदंैछ ।
शनिबार सरोकारवाला निकायहरूसँगको छलफलपछि प्रधानमन्त्री केपी शर्मा ओलीले कोरोनाभाइरसको संक्रमण नेपालमा भित्रिन नदिन सतर्कता अपनाउन निर्देशन दिए बमोजिम आइतबारबाट नेपाल आउने हवाईयात्रुको तापक्रम नाप्न थालिएको हो । यसक्रममा नेपालका पूर्व राजा ज्ञानेन्द्र शाह र पूर्व रानी कोमल शाहको पनि शारिरिक तापमान मापन गरिएको छ ।
भारत भ्रमणबाट आइतबार नेपाल फर्किएका शाह दम्पतीको विमानस्थलमा शरिरको तापक्रम जाँच भएको हो । जाँचमा दुबै जनाको तापक्रम सामान्य रहेको रेकर्ड भयो । ट्विटरमा शाह दम्पतीको शरिरको तापमान नाप्दै गरेको भिडिओ नेपाल वायुसेवा निगमका अध्यक्ष केदार बहादुर अधिकारीले आफ्नो ट्वीट गरेका छन् ।
त्यसपछि पूर्व राजा मुस्कुराउँदै तापमान लिन बसेका कर्मचारीतर्फ फर्कन्छन् । कर्मचारीले पूर्व राजाको तापमान लिन्छन् र जान दिन्छन् । त्यसपछि पूर्व राजाको पछिपछि आइरहेकी पूर्व रानी कोमलको पनि शरिरको तापमान लिन्छन् । चीनको हुबेई प्रान्तबाट गत वर्ष सुरु भएको नविन कोरोनाभाइरस पछिल्लो तथ्याकं अनुसार हालसम्म संसारका ६४ देशमा संक्रमण देखिएको छ ।
