३० फागुन, एजेन्सी । कोरोना भाइरसको संक्रमणबाट पछिल्लो २४ घण्टामा चीनमा थप ८ जनाको मात्रै मृत्यु भएको छ ।
चीनको राष्ट्रिय स्वास्थ्य आयोगले दिएको जानकारीअनुसार बिहीबार थप ८ जनाको मृत्यु भएको र २१ जनामा संक्रमण देखिएको छ । चीनमा पछिल्लो समय कोभिड–१९ को प्रकोप घटिरहेको छ ।
बुधबार चीनमा ११ जनाको मृत्यु भएको थियो भने १५ जनामा संक्रमण देखिएको थियो । बिहीबार बिहानसम्म चीनमा कोभिड–१९ को संक्रमणबाट मृत्यु हुनेको संख्या ३ हजार १ सय ७६ पुगेको छ भने ८० हजार ८ सय १४ मा संक्रमण पुष्टि भएको छ । चीनमा ६४ हजारभन्दा बढी निको भएको पनि स्वास्थ्य आयोगले जनाएको छ ।
यस्तै चीनमा कम हुँदै गरेको कोभिड–१९ को प्रकोप इटालीमा भने बढिरहेको छ । शुक्रबार बिहानसम्म इटालीमा मृत्यु हुनेको संख्या एक हजार १६ पुगेको छ भने १५ हजार एक सय १३ जनामा संक्रमण देखिएको छ । इटालीमा बिहीबार मात्रै थप १८९ जनाको मृत्यु भएको छ भने थप २ हजार ६ सय ५१ जनामा संक्रमण देखिएको छ ।
त्यस्तै इरानमा बिहीबार थप ७५ जनाको मृत्यु भएको छ भने थप एक हजार ७५ जनामा संक्रमण देखिएको छ। शुक्रबार बिहानसम्म इरानमा ४२९ जनाको मृत्यु भएको छ भने १० हजार ७५ जनामा संक्रमण देखिएको छ ।
स्पेनमा बिहीबार थप ३१ जनाको मृत्यु भएको छ। शुक्रबार बिहानसम्म स्पेनमा ८६ जनाको मृत्यु भएको छ भने ३ हजार १ सय ४६ जनामा संक्रमण देखिएको छ ।
त्यस्तै अमेरिकामा बिहीबार थप ३ जनाको मृत्यु भएको छ भने थप ४४६ जनामा संक्रमण देखिएको छ। शुक्रबार बिहानसम्म अमेरिकामा ४१ जनाको मृत्यु भएको छ भने एक हजार ७ सय ४७ जनामा संक्रमण देखिएको छ ।
यसैबीच चिनियाँ राष्ट्रपति सी चिनफिङले संयुक्त राष्ट्र संघका महासचिव एन्टोनियो गुटरेसलाई फोन गरी कोभिड–१९ विरुद्ध तत्काल कदम चाल्न आग्रह गरेका छन्।
महासचिव गुटेरेससँग राष्ट्रपति सीले अन्तर्रा्ष्ट्रिय समुदायले तत्काल कदम चाल्न आवश्यक रहेको बताए। कुराकानीमा अवसरमा राष्ट्रपति सीले विश्व स्वास्थ्य संगठनलाई २० मिलियन अमेरिकी डलर सहयोग उपलब्ध गराउने जानकारी पनि दिए।
