२ चैत, काठमाडौँ ।
प्रधानमन्त्री केपी शर्मा ओलीले कोरोनाविरुद्ध नेपालले पर्याप्त सजकता अपनाएको बताएका छन् । दक्षिण एशियाली क्षेत्रीय सहयोग संगठन (सार्क) सदस्य राष्ट्रका कार्यकारी प्रमुख तथा प्रतिनिधिहरूको भिडियो कन्फरेन्समा बोल्दै प्रधानमन्त्री ओलीले कोरोना भाइरस (कोभिड–१९) लाई नेपालमा प्रवेश रोक लगाउने गरी काम भइरहेको बताएका हुन् ।
आईतबार सिंहदरबारस्थित प्रधानमन्त्री तथा मन्त्रिपरिषद्को कार्यालयबाट कन्फरेन्समा सहभागी हुँदै ओलीले कोरोनाको संक्रमण हाल नेपालमा नरहेको बताउँदै नेपालमा भेटिएको एकमात्र कोरोना संक्रमित बाहिरबाट आएको र ती व्यक्तिलाई निको भएको उल्लेख गरे।
सरकार कोरोना प्रकोप हुन रोक्नका लागि विभिन्न तहमा काममा लागेको ओलीले जानकारी दिए।प्रधानमन्त्री ओलीले कोरोनाको सम्भावित संक्रमणलाई ध्यानमा राखेर अस्पतालहरुमा आइसोलेसन सेन्टर स्थापना गरिनुका साथै क्षमतावृद्धि गरिएको बताए। प्रधानमन्त्री ओलीले नेपालले नेपाल भ्रमण वर्ष २०२० तथा तेस्रो मुलुकका गतिविधि र अन्तर्रा्ष्ट्रिय सम्मेलनहरुको आयोजना स्थगन गरिएको पनि बताए। उनले अन्य मुलुकबाट अनअराइभल प्रवेशाज्ञा रोकिएको, सङ्घीयस्तरदेखि स्थानीय तहसम्म रोकथाक तथा नियन्त्रण समन्वय समिति गठन गरिएको बताए ।
कोभिड–१९ को संक्रमण फैलिन नदिन सार्कस्तरमा रणनीति तय गर्न यस प्रकारको कन्फरेन्स आयोजना गरेकामा भारतीय समकक्षी नरेन्द्र मोदीलाई आभार व्यक्त गर्दै प्रधानमन्त्री ओलीले आफ्नो स्वास्थ्यस्थितिबारे चासो राखेकामा सार्कका नेताहरुलाई धन्यवाद दिएका थिए।
भारतीय प्रधानमन्त्री मोदीले गत फागुन ३० गते ट्विटमार्फत् कोरोना रोकथामका लागि छलफल गर्न आव्हान गरेपछि सार्कका सबै राष्ट्रले समर्थन गर्दै उक्त ‘भिडियो कन्फरेन्स अन सार्क लिडर्स अन कम ब्याटिङ कोरोना भाइरसस् सेटिङ यान एक्जाम्पल फर द वल्र्ड’ मा सहभागी भएका हुन् ।
दोस्रोपटक मिर्गौला प्रत्यारोपण गरेपछि शुक्रबार डिस्चार्ज भएका प्रधानमन्त्री केपी शर्मा ओली पहिलोपटक सार्वजनिक कार्यक्रममा सहभागी भएका हुन्।
