विराटनगर, चैत १०
चैत १७ देखिहुने विराट गोल्डकप फुटबल प्रतियोगिताका लागि धमाधम तयारी भइरहेको छ । प्रतियोगिताका लागि मैदानदेखि लिएर व्यवस्थापनसम्बन्धी ८० प्रतिशत काम सम्पन्न भएको आयोजकले जनाएको छ ।
प्याराफिट डिभाईड, मैदान तयार, प्रवेशद्धार निर्माण, भीआईपी लाउन्ज, रातिका लागि लाइट र सीसी क्यामेरा जडान, स्टेज सजावट लगायतका काम धमाधम भइरहेका छन् ।
प्रतियोगिताको पाँचौं संस्करण रुपमा चैत १७ देखि २६ गतेसम्म गोल्डकप हुँदै छ । विराटनगरको प्रतिष्ठासंग जोडिएको गोल्डकपलाई व्यवस्थित रुपमा आयोजना र सम्पन्न गर्नका लागि २६ वटा उपसमितिहरु गठन गरिएका छन् ।
प्रतियोगितामा नेपालका सात र विदेशका तीन गरेर १० वटा टिमले सहभागिता जनाउने छन् । पूर्वघोषित बंगलादेशी टिम भने नआउने भएको छ । बंगलादेश नआउने भएपछि भारतकै दुईवटा टिम गोल्डकपमा आउने भएका छन् । प्रतियोगितामा नेपालका मनाङ मस्र्याङदी क्लब, सशस्त्र प्रहरी वल, थ्री स्टार, नेपाल पुलिस क्बल, नेपाल आर्मी, रमपम झापा ११ र आयोजक रिजालको मोरङ ११ गरेर सातवटा टिम सहभागी हुँदैछन् ।
२०७२ सालको प्रतियोगिताको उपाधि नेपाल पुलिसको जितेको थियो । गोल्डकपमा उद्घाटनका दिन ५ः३० बजेदेखि र त्यसपछि प्रत्येक दिन ६ बजेपछि खेल खेलाइने छ । आयोजकले दर्शकलाई आकर्षित गर्नकै लागि रात्रिकालीन खेल खेलाउन लागिएको जनाएको छ ।
