काठमाडौँ, चैत १०
युवा संघ नेपालले सो संगठनबाट प्रतिनिधिसभा र प्रदेशसभामा निर्वाचित सदस्यलाई यहाँ आज सम्मान गरेको छ । सम्मानित हुनेमा प्रदेशसभा सदस्य राजीव पहारी, चन्द्र लामा, मञ्जु यादव, हिराचन्द्र केसी र सुनिता चौधरी तथा प्रतिनिधिसभा सदस्य निरुदेवी पाल रहेका छन् ।
सो अवसरमा नेकपा एमाले पोलिटब्यूरो सदस्य महेन्द्रबहादुर पाण्डेले मुलुकको विकास र समृद्धिको जनचाहनालाई पूरा गर्न जनप्रतिनिधिलाई जिम्मेवार भई भूमिका निर्वाह गर्न आग्रह गर्दै राजनीतिक परिवर्तनका लागि युवाको उल्लेखनीय भूमिका रहेको बताए ।
नेकपा माओवादी केन्द्रका नेता आरसी लामिछाने, वाइसिएलका अध्यक्ष दीपशिखा, युवा संघका अध्यक्ष राजीव पहारी, सोही संघका उपाध्यक्ष दिलु पन्तलगायतले मुलुकको युवा आन्दोलनमा बौद्धिक बहसको खाँचो रहेको बताउँदै पार्टीभित्रका गुट उपगुटको पक्षमा नभएर मध्यमार्गी दृष्टिकोणको विकास गरी युवाले पार्टी र देशको नेतृत्व लिनुपर्नेमा जोड दिए । कार्यक्रममा संघका सचिव नरेश शाहीले नेपाली युवा आन्दोलनको समीक्षा र कार्यदिशाबारे कार्यपत्र प्रस्तुत गरे ।
रासस
