२५ चैत, काठमाडौँ । सरकारले लकडाउनको अवधिभर यसअघि जारी गरिएका पुरानै सवारी पासलाई नै निरन्तरता दिएको छ । गृह मन्त्रालयले सवै जिल्ला प्रशासन कार्यालयलाई परिपत्र गर्दै सवारी पास लिन आउँदा उत्पन्न भिडभाड नियन्त्रण गर्न यसअघि जारी भएका पासबाटै आवागमनको व्यवस्था मिलाउन निर्देशन दिएको हो ।
सोमबार सरकारले दोस्रो पटक वैशाख ३ गतेसम्मका लागि लकडाउनको अवधि थपेको छ । यसअघि चैत ११ गतेदेखि गरिएको लकडाउन १७ गतेको मन्त्रिपरिषद् बैठकले आजसम्मका लागि थपेको थियो । गृह मन्त्रालयका प्रवक्ता केदारनाथ शर्माले अत्यावश्यक सेवाका लागि यसअघि जारी भएका सवारी पासलाई नै निरन्तरता दिने गरी व्यवस्था मिलाउन स्थानीय प्रशासनहरुलाई निर्देशन दिइएको बताए ।
सकेसम्म भिडभाड हुनै नदिन र अत्यावश्यक सेवा प्रवाहमा हुने मानिसको चापलाई पनि व्यवस्थित बनाउन पुरानै पासलाई निरन्तरता दिइएको बताए । गृहको परिपत्र पछि सोमबार नै काठमाडौंका प्रमुख जिल्ला अधिकारी जनकराज दाहालको अध्यक्षतामा बसेको जिल्ला सुरक्षा समिति बैठकले पुरानै पासलाई निरन्तरता दिने निर्णय गरिसकेको छ ।
