२५ चैत, काठमाडौँ । चीनको वुहानबाट उद्धार गरेर ल्याइएका १ सय ७५ जना नेपालीलाई चाटर्ड उडान गर्ने नेपाल वायुसेवा निगमलाई सरकारले सोमबार ५१ दिनपछि भुक्तानी गरेको छ ।
स्रोतका अनुसार अर्थ मन्त्रालयले संस्कृति,पर्यटन तथा नागरिक उड्डयन मन्त्रालयलाई उडानको भाडा वापत रकमान्तर गरेको ४ करोड ३५ लाख ९७ हजार ६ सय ११ रुपैयाँ निगमको खातामा पठाइएको हो ।
कोराना भाइरसको उद्धगमस्थल चीनको वुहानमा रहेका नेपालीलाई उद्धार गरेर काठमाडौं ल्याउन सरकारको अनुरोधमा निगमको वाइडबडी विमान फागुन ३ गते त्यसतर्फ गएको थियो ।
१ सय ७५ जनालाई बोकेर वाइडबडी त्यही रात काठमाडौं फर्केको थियो । सरकारले उनीहरुबाट भाडा भने उठाएको थिएन । उक्त चाटर्ड उडानको भाडा दर सरकारले प्रति घन्टा १८ हजार १ सय डलरका दरले निगमलाई ४ करोड ३५ लाख रुपैयाँ तिरेको हो ।
निगमको नियम अनुसार चार्टर उडानमा अगी्रम भुक्तानी गरेपछिमात्रै जहाज उडाउनुपर्ने हुन्छ । तर, सरकारले नै चार्टर रकम दिने ग्यारेन्टी गरेको अवस्थामा निगमले भुक्तानी ढिलाइ हुने भएपनि उडान गर्छ । निगमका निमित्त महाप्रबन्धक गणेश बहादुर चन्दका अनुसार, सरकारलाई कमिसनबापत ५ प्रतिशत रकम भने छुट हुँदैन ।
यसैबीच चैत १५ गते स्वास्थ्य सेवा विभागले चार्टर गरेको उडानको भाडा भने निगमले पाएको छैन । यो क्रेडिट उडानमा पनि सरकारी निकायलाई ५ प्रतिशत कमिशन नहुने नायब महाप्रवन्धक चन्दले बताए । तर, निजी क्षेत्रका व्यापारीहरुका लागि औषधि लगायतका स्वास्थ्य सामाग्री ल्याउन जहाज चार्टर गर्ने फ्ल्यास फ्रेइट लजेस्टिक लिमिटेडलाई भने निगमले आर्थिक विनियम अनुसार ५ प्रतिशत कमिसन दिनुपर्ने उनले बताए ।
