Nepal Times
Nepal Times
3
Shares

प्रवासी नेपालीको नेपाल सरकारलाई मर्मस्पर्शी खुला पत्र

श्री सम्माननीय प्रधानमन्त्री केपी शर्मा ओली ज्यु ,
सिंहदरवार बालुवाटार काठमाडौं ।

विषय : भारतमा अलपत्र परेका नेपालीहरूको उद्धार गर्नुपर्ने बारेमा

सम्माननीय प्रधानमन्त्री तथा नेपाल सरकार उच्च पदमा बस्नु भएका मन्त्री ज्युहरू उपरोक्त विषय सम्बन्धमा अहिले विश्वभर ( कोभिड १९) महामारीले मानव जातीलाई ठूलो आतंकित बनाएको कुरा सर्बविदितै छ , जसले सम्पूर्ण विश्वको जनजीवन असहज भएको छ , त्यसमा पनि जनजिविकाको सवालमा प्रत्यक्ष असर मजदुरहरुमा बढी परेको छ । गरिव र हाम्रो देशमा रोजगार नभएको कारणले नेपालबाट भारतमा मजदुरी तथा अन्य कामको शिलशिलामा जानेको संख्या अधिक छ । त्यसमा पनि सुदूरपश्चिम प्रदेशबाट भारतमा मजदुरी गर्न जानेको संख्या अरु प्रदेशको तुलनामा निकै धेरै छ । जुन समस्याका बारेमा तपाईहरूलाई जानकारी नै छ होला ।

कोभिड १९ नियन्त्रण गर्नका लागि भारत र नेपालमा लकडाउन भएका ४५ दिन बढी भयो र अझै लकडाउन थप भएको छ । यो कहिलेसम्म जारी रहन्छ अनिश्चित छ । जसले गर्दा जीवन झनै कष्टकर भएको छ । यो कोरोनाको कारणले भारतमा ठूलाठूला होटल, कम्पनी ब्यबसायहरू बन्द भएकाछन ,जसको कारणले भारतमा रहेका नेपाली मजदुरहरुले काम गरेर खाने अवस्था छैन । काममा जान नपाएको ५२ दिन भयो । कोही काम बाट निकालिएका छन, कोही कामको लागि लकडाउन हुनुभन्दा ८/१० दिन अगाडी मात्रै भारत आएका छन् । कोही औषधी उपचार गर्न आएर यतै फसेका छन, कोही भोकभोकै बसेको प्रत्यक्ष हामीले देखेका छौँ । घरपरिवार एकातिर छन,हामी एकातिर छौ ।घरको चिन्ता उत्तिकै छ, सिमा नाका बन्द छ । अर्काको देशमा न त सरकारले हेर्छ न ता हाम्रो महामहिम राजदूतले हेरेका छन । न त अधिकार दावी गर्ने ठाउँ नै भयो । आफ्नो पीडा सामाजिक संजालमा पोखिराखेका छौँ ।

नेपाल सरकार, प्रदेश सरकार र स्थानीय सरकारले आफ्नो बारेमा केही चिन्ता गर्छ कि भन्ने पर्खाइ र सिमा नाका कहिले खुल्ला र घर फर्कन पाउँला भन्दै तड्पिएर बसेका छौ । आफ्नो देशको नागरिकको जीउ धनको सुरक्षा गर्नु राज्यको जिम्मेवारी र कर्तव्य हो । भारतमा संक्रमितको संख्या बढ्दै गएकोले भारतमा रहेका हामी नेपालीहरु असुरक्षित र त्रसित भएका छौ भन्ने कुरा प्रष्ट नै छ । यस्तो विषम परिस्थितिमा कुनै पनि तहको सरकारले भारतमा मजदुरी गर्ने नेपालीहरुको उद्दार तथा राहतको लागि केही पहल गरेको तथा प्रक्रिया थालनी गरेको समाचार सुन्नमा आएन ।

तसर्थ सम्पूर्ण भारतमा बस्ने नेपाली दाजुभाई दिदिबहिनीहरुको पीडालाई महशुस गर्दै , नेपाल सरकार मार्फत भारत सरकारसंग समन्वय गरि सम्झौता गरि अलपत्र परेका नेपालीहरूलाई नेपालमा लगेर क्वारेन्टाईनमा राखेर सम्पूर्ण भारतमा अलपत्र परेका नेपाली नागरिकहरू को पीड़ा लिएर भारतभरी अलपत्र परेका नेपाली हरूको उद्धार गरि ब्यबस्थित ढङ्गले आफ्नो नागरिकलाई आफ्नो देश फर्काउन नेपाल सरकारलाई यसै पत्र मार्फत आग्रह र बिनम्र अनुरोध गर्दछु ।

भारतको महाराष्ट्र पुनाबाट
गणेशसिंह पुजारा
महाकाली नगरपालिका चाँदनी २, कञ्चनपुर

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.