गौशाला, २८ चैत ः कर्तव्य ज्यान मुद्दामा कारागार गृहमा बस्दै आएका एक कैदीको आज बिहान उपचारका क्रममा मृत्यु भएको छ ।
मृत्यु हुनेमा महोत्तरीको साबिक हरिहरपुर हरिणमरी–९ का ८० वर्षीय रामेश्वर सदा मुसहर रहेको कारागार कार्यालय महोत्तरी जलेश्वरका प्रमुख शोभेन्द्र ठाकुरले बताए ।
महोत्तरी जिल्ला अदालतको २०६२ असार १५ गतेको फैसलाअनुसार उनलाई कर्तव्य ज्यान मुद्दामा २० वर्ष कैद तोकिएको थियो ।
कर्तव्य ज्यान मुद्दामा फरार रहेका मुसहरलाई जिल्ला प्रहरी कार्यालय महोत्तरीले गत मंसिर ८ गते पक्राउ गरी अदालतमा उपस्थित गराउँदा सोही मितिदेखि लागू हुनेगरी अदालतले उनलाई कारागार कार्यालय महोत्तरीमा कैद भुक्तानीका लागि पठाएको थियो ।
पक्राउ पर्नुअघि देखि नै क्षयरोगका बिरामी रहेको र गत सोमबार अचानक अत्यधिक बिरामी हुँदा उपचारका लागि उनलाई जिल्ला अस्पताल जलेश्वरमा पठाई आकस्मिक कक्षमा भर्ना गराईएको थियो । उपचारकै क्रममा उनको आज विहान करिब १० बजे अस्पतालमा मृत्यु भएको प्रमुख ठाकुरले जानकारी दिए ।परीक्षणपछि मृतक सदाको शव परिवारजनलाई बुझाउने तयारी गरिरहेको कारागार प्रशासनले जनाइएको छ ।
रासस
