४ असार, काठमाडौं ।
टोखा नगरपालिकाले चीनको नाग्छु नगरपालिकाबाट ल्याएको स्वास्थ्य सामग्री सबै वडामा वितरण गरेको छ । विश्वव्यापी रुपमा फैलिएको कोभिड–१९ को रोकथाम र नियन्त्रणका लागि चीनको नाग्छु नगरपालिकाले जेठ १५ गते टोखालाई स्वास्थ्य सामग्री हस्तान्तरण गरेको थियो ।
टोखाका नगरप्रमुख प्रकाश अधिकारीले चीनबाट सहयोगस्वरुप ल्याएको स्वास्थ्य सामग्री टोखाका ११ वटै वडामा वितरण गरिसकिएको जानकारी दिए । चीनको नाग्छु नगरपालिकाले टोखा नगरपालिकालाई विभिन्न किसिमका माक्स ३० हजार थान, थर्मल गन ३०० थान, व्यक्तिगत सुरक्षा उपकरण (पीपीई) तीन हजार थान, मेडिकल आइसोलेसन चस्मा तीन हजार थान, पञ्जा पाँच हजार थान, मेडिकल जुत्ता तीन हजार थान र स्यानिटाइजर सहयोग गरेको छ ।
उक्त सामग्रीको मूल्य एक करोड ८६ लाख रुपैयाँबराबर छ । टोखा नगरपालिकाले कोरोना रोग फैलन नदिन जाँचलाई बढाएको छ । टोखाले आगामी आर्थिक वर्ष ०७७–७८ मा प्राथमिक स्वास्थ्य केन्द्र टोखामा दुई शय्याको सुविधा–सम्पन्न आइसोलेसन निर्माण गर्नसमेत लागेको छ ।
उक्त सुविधा–सम्पन्न आइसोलेसन निर्माणका लागि आगामी आवको नीति तथा कार्यक्रममा बजेट विनियोजन गर्ने नगरप्रमुख अधिकारीको भनाइ छ । आइसोलेसन स्थापनासँगै कोरोना रोगको उपचारमा थप सहयोग पुग्ने विश्वास टोखा नगरपालिकाले लिएको छ ।
