योगेन्द्र योगी
१४ असार, दोहा ।
आफ्ना इच्छा, चाहना वा आवश्यकता परिपूर्तिकालागिआफ्नो देश छाडेर रोजगारीका लागि अन्य मुलुक जानुलाई नै वैदेशिक रोजगारीका रुपमा लिइन्छ । नेपालमा औद्योगिक क्रियाकलाप अत्यन्तै कमजोर र कृषिमा पनि परम्परागत प्रणालीले गर्दा आयमा कमी हुँदा जीवन निर्वाह गर्न पनि कठिन परिरहेको छ । जसले गर्दा लाखौ नेपाली युवा वैदेशिक रोजगारमा जान बाध्य भए र रोजगारीमा गएका युवाहरु मध्ये दैनिक एक जना त काठको बाकसमा फर्किने गरेका छन् ।
लोक गायक प्रकाश सपूतलेले भने जस्तै धन ल्याउछु भन्दै गएका थियौ,उडेर आकाशमा। कस्तो भइगयौ,कस्तो भइआयौ,काठको बाकसमा । यो गीतलाई चरितार्थ गर्दै सुन्दर सपनाहरु मनमा राखेर खाडी लगायत बिभिन्न देश पसेका नवजवान युवाहरु यसरी दैनिक काठको बाकसमा फर्किनु पर्दा कस्को मन नरोला र ?यस्तै, कोरोना र अन्य विभिन्न कारणले खाडी लगायत मलेसियामा मृत्यु भएर रोकिएका ८७ वटा नेपाली कामदारको शव नेपाली पठाईएको खाडीस्थित नेपाली दूतावासहरुले जनाएका छन् । विदेशबाट नेपालीहरुको स्वदेश फिर्ती सँगै त्यहाँ रोकिएका शव पनि नेपाल पठाईएको हो ।
नेपालमा लकडाउन भएपछि कोरोना लगायत अन्य विभिन्न कारणले ४० जनाको मृत्यु भएको र हालसम्म २० जनाको शव नेपाल पठाईसकिएको छ भने ९ वटा शव कतारमै दाहसंस्कार गर्न परिवारबाट सहमति प्राप्त भएको र ३ जनाको दाहसंस्कार सम्पन्न भईसकेको कतारस्थित नेपाली दूतावासले जनाएको छ । कतारमा अझै ११ जनाको शव रहेको छ । हालसम्म साउदीबाट २० वटा शव, मलेसियाबाट ३१ वटा शव, कुवेतबाट ७ जनाको शव नेपाल पुगिसकेको छ भने यूएईबाट ५ नेपालीको शव नेपाल पठाईसकिएको त्यहाँ स्थित नेपाली दूतावासले जनाएको छ । यस्ता, बहराइनबाट ३ वटा शव, ओमानबाट १ वटा शवपनि नेपाल पुगिसकेको छन् । अझै बाँकी कतारमा ११ जनाको शव, साउदीमा ५९ शव र मलेसियामा २३ शव बाँकी रहेको त्यहा स्थित दूतावासहरुले जनाएका छन् । यस्तै यूएईमा १४ जनाको शव, कुवेतमा ५ जनाको शव र बहराइनमा १ जना शव नेपाल पठाउन बाँकी रहेको छ ।
