काठमाडौँ, ४ वैशाख ः विश्व सम्पदा दिवसका अवसरमा हनुमाढोकादेखि स्वयम्भूनाथसम्म ‘सम्पदा साइक्लिङ यात्रा’ गरिएको छ ।
विश्व सम्पदा उत्सव मूल समारोह समितिले आयोजना गरेको यात्रामा त्यस क्षेत्रमा रहेका ऐतिहासिक–सांस्कृतिक महत्वका सम्पदास्थलको सहभागीहरूलाई भ्रमण गराइएको हो।
मरुगणेश, काष्ठमण्डप, मरुहिटी, सन्तानेश्वर महादेव, मरुबही, बञ्जाहिटी, नरदेवी, लोकेश्वर गल्ली, भुरुङ्खेल, डल्लु चौतारा, भुइखेल हुँदै स्वयम्भू क्षेत्रसम्म साइक्लिङ गरिएको थियो । हनुमानढोका स्वयम्भूनाथसम्मको दूरी २.२ किलोमिटर छ ।
प्रदेश नं ३ का भौतिक पूर्वाधार मन्त्री केशव स्थापितले सो यात्रा शुभारम्भ गर्दै एक विश्व सम्पदास्थल हनुमानढोकादेखि अर्को विश्व सम्पदास्थल स्वयम्भूसम्मका प्राचीन महत्वका सम्पदाको प्रवद्र्धन गर्न सकेमा पर्यटन उद्योगको समेत विकास हुने बताए ।
सांसद जीवनराम श्रेष्ठले यस क्षेत्रमा रहेका पुराना सम्पदाले तत्कालीन समाजको अध्ययन गर्न सहयोग पुग्ने बताउँदै यस क्षेत्रका सम्पदामार्ग निर्माणका लागि गृहकार्य भइरहेको जानकारी दिए ।
समितिका सचिव डिल्लीरत्न तुलाधरले विश्व सम्पदा दिवसमा हाम्रा सम्पदालाई देश विदेशमा प्रचार गर्न यही वैशाख २ गतेदेखि सप्ताहव्यापी कार्यक्रम शुरु भइसकेको जानकारी दिँदै चेस, कबड्डी, स्केटबोर्डलगायत खेल आज खेलाइने बताए । विश्व सम्पदा दिवस भोलि बुधबार मनाइँदै छ ।
