६ साउन, काठमाडौं । भारतको सिमावर्ती क्षेत्रमा रहेका सलहका झुण्ड कुनै बेला पनि नेपाल प्रवेश गर्न सक्ने भएकाले सावधानी अपनाउन विज्ञले आग्रह गरेका छन् ।
भारतको राजस्थानबाट केही झुण्ड उत्तर प्रदेशतर्फ प्रवेश गरेको र हावाको बहाबसँगै नेपाल आउन सक्ने भएकाले सावधानी अपनाउन प्लान्ट क्वरेण्टीन तथा विषादी ब्यवस्थापन केन्द्रका सूचना अधिकारी रामकृष्ण सुवेदीले जानकारी दिए ।
रातको समयमा र पानी परेको समयमा उड्न नसक्ने भए पनि हावाको तीब्र बहाबका कारण जुनसुकै बेला नेपाल आउन सक्ने सम्भावना भएकाले आवश्यक सतर्कता अपनाउन उनले आग्रह गरेका छन् । साथै सलह भगाउनका लागि आवश्यक पूर्व तयारी गर्न पनि केन्द्रले किसानलाई आग्रह गरेको छ ।
केन्द्रको पछिल्लो अनुमानअनुसार भारतको राजस्थानमा रहेका सलहको झुण्ड जयपुर तथा दिल्ली हुँदै उत्तर प्रदेशको आग्रा, कानपुर, ग्वालीयरतर्फ अगाडि बढ्न सक्ने देखिएको छ । यही सलहको झुण्ड पश्चिम, दक्षिण पश्चिम तथा दक्षिणबाट हावासँगै नेपालको मध्य तथा पश्चिम तराई र सुदूरपश्चिम क्षेत्रबाट जुनसुकै बेला नेपाल प्रवेश गर्ने सम्भावना भएको हो ।
भारतको मौसम विज्ञान विभागका अनुसार ७ गतेसम्म राजस्थानमा हल्का वर्षाको मात्रै सम्भावना छ । उत्तराखण्ड र उत्तरप्रदेशमा आज र भोलि सामान्यदेखि पूर्ण बदली रही त्यस क्षेत्रका धेरै ठाउँमा पानी पर्ने सम्भावना छ ।
पानी परेको बेला सलह नउड्ने भए पनि हावाको तीब्र बहाबका कारण जतिबेला पनि आउन सक्ने भएकाले सावधानी भने अपनाउन उनले आग्रह गरेका छन् ।
यसैबीच साउन १ गते दिउँसो बाँकेबाट नेपाल छिरेको सलहको झुण्ड सुर्खेत तथा आसपासका क्षेत्रमा र अर्को झुण्ड दशरथपुरबाट उत्तरतर्फ दैलेखको भगवतीमाइ तथा बीरेन्द्रनगरको वडा नं १ तथा जाजरकोटसम्म पुगेको जानकारी प्राप्त भएको सुवेदीले बताए ।
सलहले विशेषगरी तरकारी बालीमा केही क्षति गरे पनि पूर्वतयारी र सतर्कताका कारण धेरै नोक्सानी नभएको उनको भनाई छ । सलह भगाउनका लागि धुवाँ, ध्वनी, अन्य विविध उपायहरुका साथै विषादीकोसमेत प्रयोग गरिएको छ ।
अहिले मौसम प्रतिकूल भएकाले अग्ला रुखहरु तथा जङ्गलमा आश्रय लिइरहेकोले विषादी प्रयोग गरेर मार्न कठिनाइ भइरहेको सुवेदीले बताए । कञ्चनपुरको पुनर्वास क्षेत्रमा रहेको सलहको झुण्ड भने सिमावर्ती भारतमा तथा यसको केही अंश डडेलधुरा तथा बैतडीसम्म पुगेका छन् ।
यस्तै गएको २८ गते नेपाल प्रवेश गरेको झुण्ड भने प्युठान हुँदै गुल्मी, बाग्लुङ लगायतका क्षेत्रमा प्रवेश गरेको जानकारी प्राप्त भएको पनि उनले बताए ।
