७ साउन, काठमाडौं । अपहरणमा परेको भनेर प्रहरीमा उजुरी आएपछि खोजतलास गर्ने क्रममा ती व्यक्ति होटलमा युवतीसँग भेटिएका छन् ।
अपहरित भएको भनेर महानगरीय अपराध अनुसन्धान महाशाखा, बानेश्वरले खोजी गरिरहेका व्यक्ति काठमाडौं–४, चुनदेवीका ३० वर्षीय शक्तिराज रेग्मी होटलमा भेटिएका हुन् ।
गएराति उनी बसपार्कस्थित सुगन्ध होटलमा भेटिएका हुन् । उनी पक्राउ परेपछि अपहरणको नाटक गरेको खुलेको महाशाखाका एसपी ईश्वर कार्कीले बताए ।
विभिन्न व्यक्तिसँग जग्गा व्यवसाय गर्छु भनेर उठाएको ऋण फिर्ता दिनु नपरोस् भनेर रेग्मीले अपहरणको नाटक गरेको पाइएको एसपी कार्कीले बताए ।
गलत सूचनाले प्रहरीलाई हैरानी र राज्यको स्रोत साधनको दुरुपयोग भएको भन्दै उनलाई पक्राउ गरिएको हो ।
