१० असोज, एजेन्सी ।
नेपाली लेग स्पिनर सन्दीप लामिछाने सम्मिलित दिल्ली क्यापिटल्सले इन्डियन प्रिमियर लिग (आइपीएल)मा लगातर दोस्रो जित दर्ता गरेको छ । शुक्रबार राती दुबई इन्टरनेशनल क्रिकेट स्टेडियममा सम्पन्न आईपीएलको सातौं खेलमा दिल्ली क्यापिटल्सले चेन्नई सुपर किंग्सलाई ४४ रनले पराजित गर्दै लगातार दोस्रो जित हात पारेको हो ।
जितका लागि १ सय ७६ रनको लक्ष्य पछ्याएको चेन्नईले २० ओभरमा ७ विकेटको क्षतिमा १ सय ३१ रन मात्र बनाउन सक्योे । स्पिनर अक्षर पटेलले पाँचौं ओभरको दोस्रो बलमा शेन वाटसनलाई १४ रनमा शिम्रन हेटमायरबाट क्याच आउट गराए । छैटौं ओभरको अन्तिम बलमा मुरली विजयलाई एनरिच नोर्टजेले कागिसो रबाडाबाट १० रनमा क्याच आउट गराए । १० औं ओभरको पहिलो बलमा युवा ब्याट्सम्यान रितुराज ५ रनमा आउट भए ।
१६ औं ओभरको चौथो बलमा नोर्टजेले केदार जाधवलाई २६ रनमा एलबिडब्लू आउट गरे । १८ औं ओभरको दोस्रो कागिसो रबाडाले फाफ डु प्लेसिसलाई पन्तबाट ४३ रनमा कयच आउट गराए । फाफ ८ डु प्लेसिसले ३५ बलमा ४ चौका प्रहार गरे । अन्तिम ओभरको तेस्रो बलमा महेन्द्रसिंह धोनीलाई रबाडाले १५ रनमा क्याच आउट गराए ।
रविन्द्र जडेजा १२ रनमा क्याच आउट भए । अक्षर पटेलले ४ ओभरमा १८ रन खर्चेर १ विकेट लिए । कागिसो रबाडाले ४ ओभरमा २६ रन खर्चेर ३ विकेट लिए । एनरिच नोर्टजेले ४ ओभरमा २१ रन खर्चेर २ विकेट लिए ।
त्यसअघि टस हारेर ब्याटिङको निम्तो पाएको दिल्लीले निर्धारित २० ओभरमा ३ विकेटको क्षतिमा १ सय ७५ रन बनाएको थियो । दिल्लीलाई ओपनर शिखर धवन र पृथ्वी शाले १०.४ ओभरमा ९४ रनको साझेदारी गर्दै राम्रो सुरुवात दिलाएका थिए । यी दुईबीचको साझेदारी अनुभवी स्पिनर पियुष चवलाले ११ औं ओभरको चौथो बलमा धवनलाई एलबिडब्लू आउट गर्दै तोडेका थिए ।
धवनले २७ बलमा ३ चौका र १ छक्का सहित ३५ रनमा आउट भए । चवलाकै १३ औं ओभरको दोस्रो बलमा अघि सेर सट खेल्नेक्रममा मिसहुन पुगेपछि युवा ब्याट्सम्यान शालाई धोनीले ६४ रनमा स्टम्पिङ आउट गराएका थिए । शा ले ४३ बलमा ९ चौका र १ छक्का प्रहार गरे ।
१९ औं ओभरको अन्तिम बलमा साम करनले धोनीबाट श्रेयस ऐरलाई २६ रनमा क्याच आउट गराए । ऐरले २२ बलमा १ चौका प्रहार गरे । विकेटकिपर ऋषभ पन्त २५ बलमा ६ चौका सहित ३७ अविजित रहे । तेस्रो विकेटका लागि ऐर र पन्तले ५८ रनको साझेदारी गरेका थिए । मार्कस स्टोइनिस ३ बलमा ५ रनमा अविजित रहे ।
सुरुवात राम्रो गरेपनि उत्कृष्ट अन्त्य गर्न नसक्दा दिल्ली विशाल योगफल बनाउन चुकेको हो । चेन्नईका पियुष चवलाले ४ ओभरमा ३३ रन खर्चेर २ विकेट लिए । युवा बलर साम करनले ४ ओभरमा २७ रन खर्चेर १ विकेट लिए ।
चेन्नईले पहिलो खेलमा मुम्बई इन्डिन्सलाई ५ विकेटले पराजित गरेको थियो । दोस्रो खेलमा राजस्थान रोयल्ससँग १६ रनले पराजित भएको थियो । चेन्नईले चौथो खेलमा अक्टोबर २ मा सनराइजर्स हैदराबादसग खेल्ने छ ।
दिल्लीले पहिलो खेलमा किंग्स इलेभेन पञ्जाबलाई सुपर ओभरमा हराएको थियो । तेस्रो खेलमा दिल्लीले हैदराबादसँग सेप्टेम्बर २९ मा खेल्ने छ ।
