२८ असाेज, काठमाडौं।
नेपाल कम्युनिष्ट पार्टी (नेकपा) का अध्यक्ष तथा प्रधानमन्त्री केपी शर्मा ओली र अध्यक्ष पुष्पकमल दाहाल ‘प्रचण्ड’बीच आज बिहान करिब अढाई घण्टा लामो छलफल भएको छ । बिहान साढे ९ बजेदेखि १२ बजेसम्म भएको छलफल कर्णाली प्रदेशमा पार्टीभित्रको आन्तरिक समस्या समाधानमा केन्द्रीत भएको बालुवाटार स्रोतले जनाएकाे छ ।
प्रधानमन्त्रीको सरकारी निवास बालुवाटारमा भएकाे छलफलमा कर्णाली प्रदेशमा पार्टीभित्रको आन्तरिक समस्या समाधान, साँगठनिक प्रक्रियाको बाँकी एकताको काम लगायतमा छलफल भएको अध्यक्ष प्रचण्डका प्रेस सल्लाहकार विष्णु सापकोटाले जानकारी दिए ।
कर्णाली प्रदेशका मुख्यमन्त्रीविरुद्ध पार्टीकै सांसदबाट अविश्वासको प्रस्ताव दर्ता भएपछि देखिएको पार्टीको विवाद व्यवस्थापनमा समेत दुई अध्यक्षबीच छलफल भएको हुनसक्ने सल्लाहकार साकोटाले बताए।
गत मंगलबार अध्यक्षद्वय, महासचिव विष्णु पौडेल र स्थायी कमिटी सदस्य जनार्दन शर्मासहित भएको छलफलमा पार्टीको कर्णाली प्रदेशका पदाधिकारीलाई छलफलका लागि काठमाडौं बोलाइएको पत्र पठाइएको थियो । सोही पत्रका आधारमा कर्णाली प्रदेशका पदाधिकारी काठमाडौं आउनेक्रम जारी रहेको पार्टी स्राेतले जनाएको छ । त्यसको पूर्व तयारीस्वरुप दुई अध्यक्षबीच आज बिहान छलफल भएको हुनसक्ने दलका नेताहरुको बुझाई छ ।
पार्टी सचिवालय बैठकको कार्यसूचीअनुसार छलफल गर्नुपर्ने र दुई अध्यक्षलाई दिइएको प्रस्ताव बनाउने जिम्मेवारीसमेत हालसम्म पूरा नभएकाले दुई अध्यक्षबीच सो विषयमा समेत नियमित छलफल भइरहेको छ ।
कर्णाली प्रदेशको पार्टीको आन्तरिक समस्या बल्झेपछि त्यसमा पनि दुई अध्यक्ष व्यस्त हुनुपर्ने भएपछि सचिवालय बैठकको मिति अझै लम्बिने बुझाई नेताहरुको छ ।
