२० कात्तिक, काठमाडौँ । प्रधानसेनापति पूर्णचन्द्र थापा र भारतीय स्थलसेनाध्यक्ष जनरल नरवणेबीच औपचारिक भेटवार्ता सुरु भएको छ । यसअघि स्थलसेनाध्यक्षले बिहान सैनिक मञ्च टुँडिखेलस्थित वीरस्मारकमा श्रद्धाञ्जली अर्पण गरेका थिए ।
दुई देशबीचको सुरक्षा सहयोग आदानप्रदानसम्बन्धी तेह्रौँ बैठकमा भएको सहमतिअनुरुप स्थलसेनाध्यक्ष नरवणेले सैनिक मुख्यालयमा केही बेरमै नेपाली सेनालाई स्वास्थ्य सामग्री हस्तान्तरण गर्नेछन् ।
यसैबीच भारतीय स्थलसेनाध्यक्ष जनरल मनोजमुकुन्द नरवणेको सम्मानमा नेपाली सेनाको एक टुकडीले सम्मान गारत अर्पण गरेको छ । सैनिक मुख्यालय जङ्गीअड्डामा बिहीबार आयोजित समारोहमा सेनाध्यक्ष नरवणेले सैनिक टुकडीबाट प्रस्तुत सम्मान गारत निरीक्षण गरे । सेनाध्यक्ष नरवणेले आजै जङ्गी अड्डा परिसरमा ओखरको बिरुवा रोपेका छन् ।
प्रधानसेनापति थापाको औपचारिक निमन्त्रणामा नेपालको तीनदिने भ्रमणका लागि भारतीय सेनाध्यक्ष नरवणे बुधबार काठमाडौं आइपुगेका हुन् ।
नेपाली सेना र भारतीय सेनाबीच एक–अर्का देशका सैनिक प्रमुखलाई मानार्थ महारथी दर्जा प्रदान गर्ने परम्पराअनुरुप उनी नेपाली सेनाको मानार्थ महारथी ग्रहण गर्न नेपाल आएका हुन् । राष्ट्रपति विद्यादेवी भण्डारीले सेनाध्यक्ष नरवणेलाई बिहीबार नै नेपाली सेनाको मानार्थ महारथी दर्जा प्रदान गर्नेछिन् । नरवणे नेपालका तर्फबाट मानार्थ महारथी प्राप्त गर्ने १८औँ भारतीय सेनाध्यक्ष हुनेछन् । (रासस)
