२५ कात्तिक, काठमाडौँ ।
संयुक्त राष्ट्रसंघीय परिषद्मा मानव अधिकार उच्च आयोग मातहतमा रहने महिलाविरुद्ध हुने विभेद उन्मूलनको समिति (सिड)को नयाँ कार्यकाल(२०२१–२०२४)का लागि अधिकारकर्मी वन्दना राणा निर्वाचित भएकी छिन् ।
सिडको चालु कार्यसमितिमा पनि राणा सदस्य छिन् । राष्ट्रसंघबाट पूर्ण मान्यताप्राप्त र विश्वका १८९ राष्ट्रले अनुमोदन गरिसकेको ‘सिड’को यो कार्यसमिति निर्वाचनमा वन्दनाले १ सय ३७ मत पाएकी छिन् । ११ सदस्यीय कार्यसमितिमा नेपालसहित घाना, अस्ट्रेलिया, चीन, बहमास, लिथुआनिया, लेबनान, फ्रान्स, फिलिपिन्स, मेक्सिको र नेदरल्याण्डसमेत निर्वाचित भएका छन् ।
सिडको समितिले हरेक ४ वर्षमा मुलुकको महिला हक–अधिकार स्थितिबारेमा रिपोर्टिङ गर्छ । नेपालको छाउपडी प्रथा, महिला हिंसा र विभेदका घटनाहरुले राष्ट्रसंघीय मञ्चमा समेत बहसका लागि यही ‘सिड’ मार्फत स्थान पाउने गरेका हुन् ।
बन्दना राणा अहिले महिला बिरुद्धको विभेद उन्मुलन कमिटिमा भाइस चियर समेत छिन् । राना उक्त कमिटिमा काम गर्ने पहिलो नेपाली हुन् । उनीसँग लैंगिक समानता र महिला अधिकारका क्षेत्रमा काम गरेको झण्डै तीनदशक लामो अनुभव रहेको छ ।
राष्ट्रसंघ न्युयोर्कका लागि नेपाली राजदूत अमृतबहादुर राईले राणाको पुन निर्वाचन उनको प्रमाणित विज्ञता र अनुभवको पहिचान भएको बताएका छन् । राणाको जीत कन्भेन्सन र यसको वैकल्पिक प्रोटोकल लागु गर्नेमा नेपालको इमान्दार प्रयासमा अन्तर्राष्ट्रिय समुदायको स्वीकारोक्ति भएको राईले बताए । साथै यो नेपालले महिला अधिकारको प्रवद्र्धनमा गरेको उपलब्धीको प्रशंसा समेत रहेको राईको भनाई छ ।
निर्वाचित राणाले ‘नेपालले अन्तराष्ट्रिय मञ्चमा उठाएको महिला हक–अधिकार संरक्षण–संवर्द्धनको आवाजलाई अन्र्तराष्ट्रिय समुदायले अनुमोदन गरेको’ जनाएकी छिन् ।
