८ पुष, काठमाडौं । सत्तारुढ नेपाल कम्युनिष्ट पार्टी (नेकपा) अहिले एक त छ तर पनि एक छैन । देशको ठूलो पार्टी दुई चिरा पर्ने लगभग तय भएको देखिएको छ । विधान विपरित तीन अध्यक्ष छन् समूहगत प्रवक्ता तोकिएका छन अनि दुवै समूह आधिकारिकताको वहसमा अघि बढिसकेका छन । अब हुनु नहुनु पार्टी फुट्यो भने सबैभन्दा फाइदा भने प्रचण्डले लिनेछन । उनले मिलेर रहेको तत्कालीन एमालेलाई दुई कित्तामा पुर्याई आफ्नो तत्कालीन माओवादीलाई चैटिनसमेत नदिई पूरापूरा फाइदा लिने छन् ।
प्रचण्ड–नेपाल समूहको बहुमत केन्द्रीय सदस्यले केपी ओलीलाई अध्यक्षबाट बर्खास्त गर्दै माधव नेपाललाई अध्यक्ष बनाएको छ । नेपालमा पार्टी अध्यक्षलाई यसरी पार्टी नफुटि बर्खास्त गरिएको संभवत पहिलो घटना हो । यता ओली समूहले पनि केन्द्रीय सदस्य थप गरेको छ । तर उसले अध्यक्षमा फेरबदल गरेको छैन । दुवै समूह निर्वाचन आयोगमा पुगी आफु वैधानिक रहेको दाबी गरिरहेका छन् । निर्वाचन आयोगले यसको निकाश दिने भएपनि नेकपा एक भने छैन । तर यसको फाइदा तत्कालिन नेकपा माओवादी केन्द्रका अध्यक्ष तथा वर्तनमा नेकपाका अध्यक्ष पुष्पकमल दाहाल प्रचण्डलाई भएको देखिन्छ । नेकपा विभाजनले पूर्वमाओवादीको विभाजनलाई होइन पूर्व एमालेको विभाजनलाई संकेत गर्छ । साविक नेकपा एमालेसँगको गठबन्धनले माओवादी केन्द्रलाई प्रतिनिधिसभाको निर्वाचनमा सहयोग प्राप्त भएकै थियो । माओवादी केन्द्रले प्रत्यक्ष निर्वाचित हुने १ सय ६५ सिट मध्येमा ५३ सिट प्राप्त गर्यो । पछि एमालेसँग एकताभइ नेकपा बन्यो । त्यहि नेकपा अहिले औपचारिक रुपमा विभाजनको मुखमा पुग्दा साविक एमालेका करिब ४० जना सांसदहरुको साथ प्रचण्डले पाएका छन् । साविक माओवादी केन्द्रका नेताहरु प्रचण्डको पक्षमा एक भएर लागेका छन् । केहि तटस्थ देखिएका सांसदबाहेक पनि कुल करिब ९० सांसद प्रचण्ड–नेपाल समूहमा छन् ।
तत्कालिन नेकपा एमालेका वरिष्ठ नेता झलनाथ खनाल, माधव नेपाल, अष्टलक्ष्मी शाक्य, भीम रावल, सुरेन्द्र पाण्डे, घनश्याम भुसाल, गोकर्ण विष्ट, योगेश भट्टराई, अमृत बोहोरा, भीम आचार्य लगायत नेताहरुको साथ अहिले प्रचण्डलाई छ । प्रतिनिधिसभा विघटन भएपनि साविक एमालेका वरिष्ठ नेताहरुको साथले प्रचण्डलाई बलियो बनाएको छ । यही कारण हुन सकछ उनी दुख मनाउ गर्दै होइन उत्साहका साथ हौसिएका छन । पूर्व एमालेका १ सय १० केन्द्रीय सदस्यहरुको साथ पनि प्रचण्डले पाएका छन् । यतिमात्र होइन, राष्ट्रिय सभा, प्रदेश कमिटी र जिल्ला कमिटीहरूमा पनि पूर्व एमालेका नेताहरुको समर्थन प्रचण्ड–नेपाल समूहलाई रहँदा केपी ओली समूहसँगको तित्तता प्रचण्डलाई फापेको हो कि भन्ने अनुमान गर्न सकिन्छ । यसरी हाल नेकपा अनौपचारिक रुपमा विभाजन हुँदा तत्कालिन माओवादी केन्द्रका नेताहरु प्रचण्डकै पक्षमा छन् तर पूर्व एमालेका नेताहरु भने केपी ओली र माधव नेपाल दुई खेमामा बाँडिदै विभाजनोन्मुख भएका छन् । यो परिघटनाले प्रचण्डले पगरी हात पारेका छन भने माधव र ओली तत्कालीन एमालेका नेता विभाजन भएपछि जिल्ल परेका छन ।
