१५ फागुन, मोरङ । नेपाल युवा उद्यमी मञ्च विराटनगर च्याप्टरले घरेलु तथा साना उद्यमीहरुद्वारा उत्पादित वस्तुको बजारीकरणका लागि स्टल राखेको छ ।
युवा उद्यमीले उत्पादन गरेका वस्तुको प्रवद्र्धन गर्ने उद्देश्यले शुक्रवार दिउँसो ३ बजेदेखि राति ८ बजेसम्म मोरङको कटहरी–१ स्थित कृषि बजारको उत्तरतर्फ खाली स्थानमा बजार सञ्चालन गरेको हो । यस्तो स्टल प्रत्येक शुक्रबार सोही स्थानमा राखिने नेपाल युवा उद्यमी मञ्चका अध्यक्ष सृजन प्याकुरेलले जानकारी दिए । मञ्चले शुक्रबार सञ्चालन गरेको बजारमा नेवारी परिकारसहित १५ स्टलहरु राखिएको नेपाल युवा उद्यमी मञ्च विराटनगर च्याप्टरका प्रचार संयोजक सञ्जिब सिग्देलले बताए । कृषकहरुद्वारा स–साना मात्रामा उत्पादित वस्तुहरुलाई एकै स्थानमा राखी बजार प्रवर्द्वनमा सहयोग गर्न सञ्चालन गरिएका बजारको प्रचारात्मक पहिलो शुक्रबार उत्साहजनक उपस्थिती रहेको सिग्देलले जानकारी दिए । बजारमा अर्गानिक तरकारी, मह, नैनी, खाजा सेट र फाटफुटका सामानहरु बिक्रीका लागि राखिएका थिए ।
