९ वैशाख, विराटनगर । विश्वमा कोरोना महामारीको दोस्रो, तेस्रो लहर तीव्र गतिमा फैलिएसँगै ओमानले भारत, पाकिस्तान र बङ्गलादेशबाट आउने यात्रुलाई प्रतिबन्ध लगाएको छ ।
कोरोना भाइरसको जोखिम बढेकाले भारत, पाकिस्तान र बङ्गलादेशबाट आउने यात्रुलाई रोक लगाएको त्यहाँका सञ्चारमाध्यमले जनाएका छन् ।
प्रतिबन्ध आउँदो शनिवार देखि लागू हुनेछ । यस्तै २४ घण्टामा भारत, पाकिस्तान र बङ्गलादेशमा ट्रान्जिट परेका यात्रुलाई पनि यो प्रतिबन्ध लागू हुनेछ ।
तर ओमानका नागरिक, राजनितिक व्यक्ति तथा स्वास्थ्य कार्यकर्ताका लागि भने यो प्रतिबन्ध लागू गरिएको छैन । यद्यपि उनीहरूको स्वास्थ्य जाँच भने अनिवार्य हुनेछ ।
भारत, पाकिस्तान र बङ्गलादेशमा कोरोनाको नयाँ ’भेरिएन्ट’ फैलिएको भन्दै ओमानले त्यहाँबाट आउने यात्रुलाई रोक लगाएको हो । भारत संक्रमणको हटस्पट बनेसँगै हरेक दिन संक्रमितको संख्या पनि बढिरहेको छ ।
पछिल्लो २४ घण्टामा मात्र तीन लाखभन्दा बढीमा कोरोना सङ्क्रमण देखिएको छ । यो विश्वमै अहिलेसम्म सबैभन्दा धेरै हो । यस्तै यही अवधिमा भारतमा कोरोनाका कारण दुई हजारभन्दा धेरैको ज्यान गइसकेको छ ।
