काठमाडौँ, असार ८
राष्ट्रियसभाको आजको बैठकमा सांसदहरुले मुलुकको समसामयिक तथा स्थानीय विषयमा सरकारको ध्यानाकर्षण गराएका छन् ।
विशेष समयमा बोल्दै सांसद राधेश्याम अधिकारीले दशजोड दुईको पाठ्यक्रम परिमार्जन सम्बन्धमा आपत्ति जनाउँदै मुलुक संघीयतामा प्रवेश गरेको सन्दर्भमा पाठ्यक्रमको निर्णय गर्ने व्यवस्था प्रदेशलाई नै छाड्नु पर्नेमा जोड दिए।
सांसद बलराम बाँस्कोटाले मुलुकको कला, संस्कृति, भाषाको संरक्षणलगायत विषयलाई प्राथमिकताका साथ अघि बढाउन सरकारको ध्यानाकर्षण गराए । सांसद रामपृत पासवानले शिक्षामा दलित छात्राले पाउँदै आएको आरक्षण कोटा कटौती भएको भन्दै असन्तुष्टि जनाए ।
सांसद कमलाकुमारी ओलीले मुलुकका विभिन्न स्थानमा महिला हिंसा बढेको र आपराधिक क्रियाकलापमा संलग्न भएकाहरु खुल्लमखुल्ला हिँड्दासमेत कारबाही नभएकामा गुनासो गरे ।
सांसद उदय शर्मा पौडेलले कृषि क्षेत्रमा प्राविधिक जनशक्तिको व्यवस्थापन सही ढंगबाट हुन नसक्दा कृषि उत्पादन वृद्धि हुन नसकेको भन्दै आवश्यक कदम चाल्न सरकारलाई आग्रह गरे ।
रासस
