३० बैशाख, काठमाडौं । नेपाली कांग्रेस र नेकपा माओवादी केन्द्रका नेताहरुले बहुमतीय सरकार गठनको सम्भावना टर्दै गएको निष्कर्ष निकालेका छन् ।
बहुमतीय सरकार गठनका लागि राष्ट्रपति विद्या भण्डारीले दिएको समयसीमा सकिन केही घण्टा मात्रै बाँकी रहँदा नेताहरुले यस्तो निष्कर्ष निकालेका हुन् ।
नेकपा एमालेका नेताहरुले साथ नदिँदा र जसपाभित्रको अन्यौलले नयाँ सरकार गठनको सम्भावना लगभग सकिएको एक माओवादी केन्द्रका नेताले जनतापाटीलाई जानकारी दिए ।
‘सत्ता समीकरणका लागि निर्णायक मानिएको जसपाको महन्थ ठाकुर पक्ष केपी शर्मा ओलीको विकल्पमा अर्को सरकार बनाउन राजी नहुँदा र एमालेमा माधवकुमार नेपाल पक्षले निर्णय गर्न नसक्दा बहुमतको सरकार बनाउने सम्भावना सकिएको छ ।’ ती नेताले भने ।
कांग्रेसले सभापति एवं संसदीय दलको नेता शेरबहादुर देउवालाई प्रधानमन्त्री बनाउन प्रस्ताव गरेको थियो । माओवादी केन्द्रले देउवाको नेतृत्वमा सरकार गठन गर्न समर्थन जनाएको थियो ।
तर, बिहिबार दिउँसो जसपा अध्यक्ष ठाकुर र राजेन्द्र महतो बुढानिलकण्ठ पुगेका थिए । छलफलमा उनीहरु देउवालाई प्रधानमन्त्री मान्न नसकिने अडान लिएका थिए ।
यता, नेपाल पक्षका सांसदले राजीनामा दिएर साथ दिने कांग्रेस र माओवादीको आश थियो । तर, अहिले एमाले अध्यक्ष केपी शर्मा ओली र वरिष्ठ नेता माधवकुमार नेपालबीच छलफल भैरहेकाको छ ।
प्रधानमन्त्री ओलीले संसदमा बहुमत गुमाएपछि राष्ट्रपति विद्यादेवी भण्डारीले संविधानको धारा ७६ को उपधारा २ अनुसार सरकारमा दाबी गर्न बिहीबार ९ बजेसम्मको समय दिएकी छन्।
त्यस समयभित्र दलहरूले सहमति जुटाउन नसके राष्ट्रपतिले संविधानको धारा ७६(३) अनुसार प्रतिनिधि सभामा प्रतिनिधित्व गर्ने सबभन्दा ठूलो दलको नेतालाई प्रधानमन्त्री नियुक्त गर्नेछिन् ।
संविधानको धारा ७६(३) अनुसार प्रधानमन्त्री नियुक्त भएपछि ३० दिनभित्र पुनः विश्वासको मत लिनुपर्ने संवैधानिक व्यवस्था छ ।
