२३ असार, काठमाडौँ ।
नेकपा एमालेका राष्ट्रिय सभा सदस्य खिमलाल भट्टराईले पछिल्लो समयमा सरकारले अवैधानिक कार्य गरेको भनेर सर्वोच्च अदालतले अन्तरिम आदेश जारी गरेकोप्रति आपत्ति जनाएका छन् ।
राष्ट्रिय सभाको बुधबार बसेको बैठकको विशेष समयमा बोल्दै भट्टराईले प्रतिनिधि सभा विघटनविरुद्ध दायर भएको निवेदनमा सर्वोच्चले फैसला सुनाउन नमिल्ने टिप्पणी गरेका हुन् ।
‘संवैधानिक काम गर्दै आएको सरकारलाई काम गर्न नदिन अदालतले एकपछि अर्को निवेदन लिँदै अन्तरिम आदेश जारी गरेको छ । त्यस्तै अब अदालतले प्रतिनिधि सभा विघटन र प्रधानमन्त्री बनाउने कुरा सुनिन थालेको छ।
यो संवैधानिक हुँदैन ।’ उनले भनेका छन् । प्रधानमन्त्री केपी शर्मा ओलीले औचित्य नभएको प्रतिनिधि सभा विघटन गरेको उनको दाबी छ ।
यस्तै, भट्टराईले विपक्षीलाई सरकारको कामको विरोध वा समर्थनमा अभिव्यक्ति दिन सकिने तर कस्मेटिक राजनीति नगर्न आग्रह पनि गरेका छन् । वर्तमान सरकार संविधान कार्यान्वयनमा सफल रहेको भन्दै उनले सरकारका कामकारवाहीको बचाउ गरेका छन् ।
