२६ असार, एजेन्सी ।
कोरोना भाइरसविरुद्धको फाइजर र मोदेर्नाको खोपका कारण मुटु सुन्निने समस्या उत्पन्न हुन सक्ने देखिएको छ ।
तर यो साइड इफेक्ट निकै दुर्लभ रहेको युरोपेली नियामक निकायले बताएका छन् । युरोपियन मेडिसिन एजेन्सीका अनुसार फाइजर र मोदेर्नाको खोप लगाएका विशेष गरि युवाहरुमा मुटु सुन्निने साइड इफेक्ट देखिएको तर यो निकै दुर्लभ हो ।
तर कोभिड–१९ को खोपको फाइदा दुर्लभ साइड इफेक्टको तुलनामा निकै धेरै रहेको पनि एजेन्सीले जनाएको छ ।खोप लगाएकाहरुलाई आफूमा मुटु सुन्निने सम्बन्धी साइड इफेक्टको लक्षणलाई लिएर चनाखो बन्न आग्रह गरिएको छ ।
छाती दुख्ने, स्वासको कमी महसुस हुने तथा मुटुको चाल असामान्य हुनेसहितका लक्षण देखिने बताइएको छ । मुटुको मसल सुन्निने (मायोकार्डाइटिस) र पेरिकार्डाइटिस गरि दुई समस्या खोपसँग जोडिएको इएमएले जनाएको छ ।
फाइजर–बायोएनटेकको खोप लगाएका १४५ जनामा मायोकार्डाइटिस र १३८ जनामा पेरिकार्डाइटिस समस्या देखिएको छ । अहिलेसम्म यो खोपको १७७ मिलियन मात्रा दिइएको छ ।
यस्तै मोदेर्नाको खोप लगाएका १९ जनामा मायोकार्डाइटिस र १९ जनामा पेरिकार्डाइटिस समस्या देखिएको छ । यो खोपको २० मिलियन मात्रा दिइएको छ ।
यी समस्या देखिएका मध्ये पाँचजनाको ज्यान गएको छ । उनीहरु पाको उमेरका वा अरु स्वास्थ्य समस्या भएका व्यक्ति हुन् । अधिकांश समस्याहरु खोप लगाएको १४ दिन भित्र देखिने गरेको छ।
