काठमाडौँ, असार २०
प्रतिनिधिसभाको आजको बैठकमा भारी वर्षाका कारण देशका विभिन्न भागमा ठूलो संख्यामा जनधनको क्षति भएकाले सरकारले सक्रियरुपमा राहत र उद्धारको व्यवस्था गर्न माग गरिएको छ । बैठकको विशेष समयमा बोल्ने सांसदहरुले स्वास्थ्य र शिक्षा क्षेत्रको सुधारका लागि भन्दै डा गोविन्द केसीले शुरु गर्नुभएको अनशन, वर्षात्का कारण भएको जनधनको क्षति तथा पूर्वाधार विकासलगायतका विषयमा सरकारको धानाकर्षण गराएका हुन्।
सांसद हृदेयश त्रिपाठीले चुरे क्षेत्रको दोहनका कारण वातावरणीय समस्या उत्पादन भई तराईका क्षेत्र प्रभावित भएको भन्दै तत्काल उद्धारमा जुट्न सरकारसँग आग्रह गरे । त्यसैगरी प्रेम आले, रेशा शर्मा, महेन्द्र यादव, प्रदीप यादव र सुरेशकुमार राईले वर्षात्का कारण आम जनजीवनमा परेको नकारात्मक असरका विषयमा सरकारको ध्यानाकर्षण गराए ।
सांसद अमरेशकुमार सिंहले सभामुख र उपसभासमुख एउटै पार्टीको हुन नहुने भन्दै संसदीय मान्यताअनुसार फरकफरक दलबाट प्रतिनिधित्व हुनुपर्नेमा जोड दिए । सांसद विरोध खतिवडाले काठमाडौँ–हेटाँैडाको सुरुङमार्गको महत्वपूर्ण परियोजना भएकाले यथाशक्य चाँडो काम शुरु गर्न माग गरे। त्यसैगरी सांसद मीना सुब्बा र पार्वत गुरुङले शिक्षा र स्वास्थ्यलाई व्यवस्थित गर्नुपर्नेमा जोड दिँदै डा गोविन्द केसीले अठाएका मुद्दालाई सम्बोधन गर्नुपर्ने बताए । सांसद तेजुलाल चौधरी, गोविन्द कोशी, सुधन राई, विना श्रेष्ठ, मोतीलाल दुगड र शेषचाँद ताराले वर्षात्का कारण डुबानबाट प्रभावित जनतालाई राहत तथा उद्धार गर्नुपर्नेमा जोड दिए ।
सांसद देवप्रसाद तिमिल्सिना गोविन्द केसीको अनशन र निशेधित क्षेत्रका विषयमा सरकारको ध्यान जानुपर्नेमा जोड दिए । त्यस्तै लालबहादुर थापा र दीलकुमारीले मनसुनका कारणले पु¥याएको क्षतिका बारेमा उचित ध्यान नदिएको भन्दै त्यसतर्फ सरकारको ध्यानाकर्षण गराए ।
सांसद खेमप्रसाद लोहनी १२ मेगावाट बूढीगण्डकी जलविद्युत् आयोजनाले जनजीवनमा परेको असरका विषयमा सरकारको ध्यानाकर्षण गराए भने सांसद गोमा देवकोटाले सिन्धुलीगढी जस्तो ऐतिहासिक क्षेत्रको संरक्षण गर्न सरकारको ध्यानाकर्षण गराए ।
त्यसैगरी सांसद दुर्गा पौडेल, प्रेम सुवाल, मैनाकुमारी भण्डारी, हरिराज अधिकारी र केदारप्रसाद सिग्देलले आआफ्ना क्षेत्रमा देखिएको अत्यन्त जरुरी विषयमा सरकारको ध्यानाकर्षण गराउँदै सडक विस्तार, वर्षात्का भएको क्षतिका विषयमा सरकारले ध्यान दिनुपर्नेमा जोड दिए ।
चौध सदस्यीय कार्यव्यवस्था परामर्श समिति गठन
प्रतिनिधिसभाको आजको बैठकले १४ सदस्यीय कार्यव्यवस्था परामर्श समिति गठन गरेको छ । समितिका सदस्यहरुमा संघीय समाजवादी फोरमका उमाशंकर अरगरिया र नेपाल कम्युनिष्ट पार्टीका (नेकपा) का खगराज अधिकारी, जयपुरी घर्ती, देवप्रसाद गुरुङ, पवित्रा निरौला खरेल, भानुभक्त ढकाल, रामेश्वर राय यादव, रेखा शर्मा र शान्ता चौधरी रहका छन्।
त्यस्तै, नेपाली काँग्रेसका तर्फबाट दिलेन्द्रप्रसाद बडू, पार्वता डिसी चौधरी, पुष्पा भुसाल गौतम र बालकृष्ण खाँड रहनुभएको छ भने राजपा नेपालबाट राजकिशोर यादव छन् । आजको बैठकमा अर्थमन्त्री डा युवराज खतिवडाले ‘लेखापरीक्षण विधेयक, २०७५’ प्रस्तुत गरे । प्रतिनिधिसभाको अर्को बैठक असार २२ गते दिनको १ बजे बस्ने छ ।
रासस
