एजेन्सी ः विश्वकप फुटबल अन्तर्गत हिजो भएको क्वार्टरफाइनल खेलमा बेल्जियमसँग २–१ ले पराजित हुँदै दाबेदार ब्राजिल रसियामा जारी विश्वकप फुटबल बाट बाहिरिएको छ ।उपाधि दाबेदार मानिएको ब्राजिल पहिलो हाफमै २ गोल खान पुगेपछि विश्वकपबाट बाहिरिएको हो । दोस्रो हाफमा एक गोल फर्काए पनि विश्वकपमा अगाडि बढ्न ब्राजिलका लागि पर्याप्त भएन ।
बेल्जियमसँगको खेलमा ब्राजिलले सुरुमै आत्मघाती गोल गरेर बल्जियमलाई सहज बनाईदिएको थियो ।बेल्जियमले १३ औँ मिनेटमा पाएको कर्नर किकबाट आएको बलर्ला बेल्जियमकै भिन्सेन्ट कोम्पनीले छोएर अघि बढेको अवस्थामा ब्राजिलका मिडफिल्डर फर्नान्डिन्होले क्लियर गर्न खोज्दा जाली चुमेको थियो ।म्यानचेस्टर सिटीबाट खेल्दै आउका फर्नान्डिन्होले हेडमार्फत बचाउने कोशिश गर्दा आफ्नै जाली चुम्न पुगेपछि बेल्जियम १–० ले अघि बढेको थियो ।
खेलको ३१ औँ मिनेटमा केभिन डे ब्र्युनेले उत्कृष्ट गोल गरेपछि बेल्जियमले ब्राजिलविरुद्ध २ गोलको अग्रता बनाएको हो ।काउन्टर एट्याकका क्रममा रोमेलो लुकाकुले दिएको बललाई अघि बढाउँदै डी एरिया भन्दा बाहिरबाट प्रहार गरेका उनले सुन्दर गोल गरेरेर अग्रता २–० मा पुर्याए । रसियाको कजार एरिनामा भएको दोस्रो क्वार्टर फाइनल भिडन्तमा बेल्जियमले सुरुमै बनाएको अग्रतालाई अन्तिमसम्म जोगाउँदै सेमिफाइनल यात्रा तय गरेको हो ।
ब्राजिलले पहिलो हाफमा दुई गोल खाए पनि दोस्रो हाफमा खेलमा फर्कने कोशिश गरेको थियो । बल पोजेसन भने ब्राजिलले ५८ प्रतिशतसम्म बनाएको थियो । खेलको ७६ औँ मिनेटमा फिलिपे कोटिन्होले दिएको उत्कृष्ट हाई भली पासललाई रेनाटो एग्युस्टोले हेडमार्फत गोल गरेपछि ब्राजिलले खेललाई २–१ को अवस्थामा ल्याइ पुर्याएको थियो ।
त्यसपछि थप गोल गर्न नसक्दा ब्राजिल २–१ ले पराजित हुँदै क्वार्टर फाइनलबाटै घर फर्कियो । हिजोको खेलमा ब्राजिलका नेमार, कोटिन्हो, पाउलिन्हो र मार्सेलो जस्ता स्टार खेलाडीहरुलाई बेल्जियमको डिफेन्सले निरन्तर विफल बनाइदियो ।
