२० असोज, काठमाडौं।
नेपाली कांग्रेसका वरिष्ठ नेता रामचन्द्र पौडेलले सरकारमा सहभागी हुने मन्त्रीका विषयमा सल्लाह गर्न आफू निकट नेताहरुलाई बोलाएका छन् । उनले निजी निवास बोहराटारमा नेताहरुलाई बोलाएका हुन् ।
नेताहरुसँगको बैठक दिउँसो २ बजे बस्ने बताइएको छ । पौडेल समूहले आफ्नो भागमा परेका दुई मन्त्रालयका लागि मन्त्री छान्ने तयारी गरेको छ । पौडेल पक्षबाट डा. मिनेन्द्र रिजाल, सुजाता कोइराला, दिलेन्द्रप्रसाद बडू, तेजुलाल चौधरीमध्ये दुई मन्त्री हुने सम्भावना छ ।
कांग्रेसको भागमा आठवटा मन्त्रालय परेको छ । मन्त्रालय भागबण्डामा कुरा मिलेपछि बिहीबारसम्म मन्त्रिपरिषद् विस्तारको तयारी छ ।
संस्थापन समूहबाट तीन मन्त्री र एक राज्यमन्त्री चयन भइसकेका छन् । बाँकी चार मन्त्रीमध्ये तीन मन्त्रालय संस्थापन इतर समूहले पाउने भएका छन् । त्यसमध्ये पौडेल समूहको भागमा दुईवटा मन्त्रालय परेका छन् । एउटा मन्त्रालय कांग्रेस सभापति एवं प्रधानमन्त्री शेरबहादुर देउवाले आफ्नो समूहसँग राख्ने भएका छन् ।
