१ मंसिर, काठमाडौं ।
नेपाली महिला क्रिकेट टोलीले कतारसँगको तीन डब्लूटि२० आई सिरिज आफ्नो पोल्टामा पारेको छ । नेपालले बुधबार दोस्रो खेलमा कतारलाई ६१ रनले हराउँदै एक खेल अगावै सिरिज २–० ले जितेको हाे । पहिलो पटक सिरिज खेलेको नेपाली महिला क्रिकेट टोलीले पहिलो पटक नै डब्लूटि२० आई सिरिज जित्न सफल भएको हाे ।
वेस्ट इन्ड पार्क इन्टरनेशल क्रिकेट स्टेडियम दोहामा नेपालले प्रस्तुत गरेको १ सय ३० रनको विजयी लक्ष्य पछ्याएको कतार १९.३ ओभरमा ६८ रनमा अल आउट भयो । कतारकी कप्तान आयशाले ३२ बलमा २ चौका सहित सर्वाधिक २४ रन बनाइन् । केरी पाउनसेटले १८ बलमा २ चौका सहित १५ रन जोडिन् । एक समय १७–४ को खराब सुरुवात गरेको कतारलाई पाँचौं विकेटका लागि आयशा र केरीले ३४ रनको साझेदारी गरेका थिए । पहिलो खेलमा नेपालसँग २७ रनमा अल आउट भएको कतारले दोस्रो खेलमा भने सुधारिएको ब्याटिङ गरेको थियो ।
दोस्रो ओभरको पहिलो बलमा कप्तान सरस्वती चौधरीले ओपनर हिराल अग्रवाललाई शून्यमा सवनम राईबाट क्याच गराएकी थिइन् । तीन बलपछि सबिजा पणायना शून्यमा क्याच आउट भएकी थिइन् । चौथो ओभरको तेस्रो बलमा सरस्वतीलेनै साची धडवाल ४ रनमा एलबीडब्लू गरिन् । कप्तान रुविनाले खाडिजा इम्तिजालाई ४ रनमा बोल्ड गरेकी थिइन् ।
१४ औं ओभरको पाँचौं बलमा कविता जोशीले कप्तान आयशालाई बोल्ड आउट गरेकी थिइन् । कविताको यो पहिलो अन्तर्राष्ट्रिय विकेट हो । एलिना खान ६ र एन्जेलिन मारेले ७ रन बनाए नेपालकी मध्यगतिकी बलर सरस्वती कुमारी चौधरीले ४ ओभरमा १ मेडन सहित ८ रन खर्चेर सर्वाधिक ४ विकेट लिइन् । रुविनाले २.३ ओभरमा १२ रन खर्चेर २ विकेट लिइन् । सबनम राई, संगिता राई र कविता जोशीले १–१ विकेट लिए ।
त्यसअघि टस जितेर पहिला ब्याटिङ थालेको नेपालले निर्धारित २० ओभरमा ६ विकेट गुमाउदै १ सय २९ रन बनायो । नेपालकी कप्तान रुविना क्षेत्री बेलबासेले ४८ बलमा ४ चौका र १ छक्का सहित सर्वाधिक ५० रनमा आउट भइन् । रुविना नेपालबाट महिला टि२० आईमा अर्धशतक प्रहार गर्ने दोस्रो खेलाडी हुन् । यसअघि पहिलो खेलमा इन्दु बर्माले ५५ रनको इनिङ खेल्दै पहिलो खेलाडीको कीर्तिमान राखेकी थिइन् ।
युवा अलराउन्डर कविता कुँवरले ३० बलमा २ छक्का सहित ३१ रनमा आउट भइन् । कतारकी एन्जेलिन मारेले तेस्रो ओभरको पाँचौं बलमा एलिना खानबाट ओपनर ज्योति पाण्डेलाई ६ रनमा क्याच आउट गराएकी थिइन् । मारेले नै पाँचौं ओभरको दोस्रो बलमा काजल श्रेष्ठलाई ३ रनमा बोल्ड आउट गरेकी थिइन् । तेस्रो विकेटका लागि कविता र रुविनाले ५६ रनको साझेदारी गर्दै इनिङलाई अघि बढाएका थिए ।
११ औं ओभरको चौथो बलमा सब्जिना पणायनाले कवितालाई क्याच गराउँदै साझेदारी तोडेकी थिइन् । एलिना खानले सरिता मगरलाई ४ रनमा आउट गरिन् । डली भट्ट शून्यमा रन आउट भएकी थिइन् । अप्सरी बेगम १७ बलमा १ चौका सहित २३ रनमा अविजित रहिन् ।
कतारकी एन्जेलिन मारेले ४ ओभरमा २८ रन खर्चेर २ विकेट लिइन् । एलिना खान, साची धडवाल र सबिजा पणायनाले १–१ विकेट लिए । पहिलो खेलमा नेपालले कतारलाई १ सय १९ रनको फराकिलो अन्तरले पराजित गरेको थियो । नेपालले अन्तिम खेल बिहीबार खेल्नेछ ।
नेपालले आइसिसी वुमन्स टि२० एसिया छनोट अघि तयारीको लागि कतारसँग तीन टि२० आई सिरिज सिरिज खेलेको हो । सिरिज खेलेर शुक्रबार महिला टोली युएईतर्फ लाग्नेछ ।
