६ मंसिर, एजेन्सी ।
गत महिना प्रधानमन्त्रीलाई घरमै नजरबन्द गरी सुडानमा शुरु गरिएको सैन्य कुको अन्त्य भएको छ ।
अपदस्त गरिएका प्रधानमन्त्री अब्दुल्लाह हमदुकलाई प्रधानमन्त्रीमा पुनर्वहाली गरिएको छ । प्रधानमन्त्री हमदुक र सैनिक जर्नेल तथा सैन्य कुका नेता अब्देल फताह बुरहानबीच शक्ति बाँडफाड सम्बन्धी सम्झौतामा हस्ताक्षर भएको दृश्य संचार माध्यमहरुमा देखिएको छ । प्रधानमन्त्रीले सैनिक शासकसँग सम्झौता गरेकोमा आन्दोलनरत सर्वसाधारण भने असन्तुष्ट देखिएका छन् ।
सैनिक शासक र प्रधानमन्त्री बीच सम्झौता भएपछि पनि युवाहरुले सडक संघर्षलाई जारी राखेका छन् । दुई वर्षका लागि हमदुकलाई प्रधानमन्त्रीमा मनोनयन गरेको नागरिक गठबन्धनले कुनै पनि सम्झौता गर्न अस्वीकार गरेको थियो ।
सडकमा निस्किएका युवाहरुकै हातमा सुडानको भविष्य रहेको फोर्सेस फर फ्रिडम एण्ड चेन्ज नामक गठबन्धनले जनाएको छ । सेना राजनीतिबाट पूर्ण रुपमा अलग हुनुपर्ने माग गर्दै प्रदर्शनमा उत्रिएकाका सर्वसाधारण माथि राजधानी कार्तुममा सुरक्षाकर्मीले अश्रु ग्यास प्रहार गरेका छन् ।
गत २५ अक्टोबरमा सेनाले कु गरेपछि भएको प्रदर्शनमा ४० जना सर्वसाधारण मारिएका छन् ।
