३ पुस, एजेन्सी ।
कोरोना भाइरसविरुद्धको खोपको बुस्टर डोज अर्थात तेस्रो मात्रा नयाँ भेरियन्ट ओमिक्रोनविरुद्ध प्रभावकारी देखिएको बेलायतका अनुसन्धानकर्ताले बताएका छन्।
बुस्टर डोज लगाएमा ओमिक्रोन भेरियन्टबाट संक्रमित भएपछि गम्भीर बिरामी हुनबाट ८५ प्रतिशतसम्म जोगिन सकिने अध्ययनकर्ताले बताएका छन्। यसअघिका भेरियन्टमा भन्दा ओमिक्रोनमा खोपको प्रभावकारिता केही कम देखिएको हो। तर हालकै खोपको प्रभावकारिता ओमिक्रोनविरुद्ध पनि रहेको वैज्ञानिकहरुको विश्लेषण छ।
खोपको बुस्टर मात्रा लगाएमा ओमिक्रोनबाट संक्रमित भए पनि अस्पताल भर्ना हुनुपर्ने अवस्था नआउने देखिएको अनुसन्धानकर्ताले बताएका छन्। इम्पेरियल कलेज लण्डनका वैज्ञानिकहरुको टोलीले ओमिक्रोनका सम्बन्धमा हालसम्म प्राप्त सीमित जानकारीहरुलाई विश्लेषण गरेर ओपको बुस्टर या तेस्रो मात्राको प्रभावकारिताबारे प्रारम्भिक निष्कर्ष निकालेका हुन्।
ओमिक्रोन भेरियन्टलाई लिएर पर्याप्त जानकारी प्राप्त भएपछि मात्रै खोपको प्रभावकारिताका सम्बन्धमा विश्वसनीयतास्तर उच्च रहने गरी विश्लेषण गर्न सकिने अध्ययनकर्ताले बताएका छन्। विज्ञहरु अझै पनि ओमिक्रोनको संक्रमणले निम्त्याउन सक्ने गम्भीरताका सम्बन्धमा अध्ययन गरिरहेका छन्।
तर हालकै खोपको बुस्टर मात्रा कम्तीमा गम्भीर बिरामी हुने अवस्था आउन नदिन प्रभावकारी हुने अहिलेसम्म भएका सबै अध्ययनहरुले देखाएका छन्। गएको नोभेम्बरको अन्तिमतिर दक्षिण अफ्रिकामा पहिलोपटक पुष्टि भएको ओमिक्रोन भेरियन्टको संक्रमण विश्वका झण्डै ८० देशमा पुष्टि भइसकेको छ।
