१७ फागुन, एजेन्सी ।
युक्रेनका राष्ट्रपति भोलोडिमिर जेलेन्स्कीले पश्चिमा देशले रुसी मिसाइल, विमान तथा हेलिकप्टरको उडानमा प्रतिबन्ध लाग्ने गरी ‘नो–फ्लाइ जोन’ नियम लागु गर्नु पर्ने माग गरेका छन् ।
रुसले युक्रेनका शहरमा गोलबारी गरिरहेको छ । त्यसलाई रोक्नका लागि पश्चिमा देशले रुसलाई लक्षित गरी नो–फ्लाइ जोनको घोषणा गर्नु पर्ने जेलेन्स्कीले माग गरेका हुन् । सोमबार जारी गरेको भिडियो सन्देशमा जेलेन्स्की यो नियम कसले र कसरी लागु गर्ने भन्नेबारे स्पष्ट पारेका छैनन् ।
रुसले पछिल्लो पाँच दिनमा युक्रेनमाथि ५६ वटा रकेट तथा ११३ वटा क्रुज मिसाइल प्रहार गरेको जेलेन्स्कीले बताए । रुसले गएको बिहीबारदेखि युक्रेनमाथि आक्रमण गर्दै आएको छ । रुसले युद्ध अपराध गरेको आरोप जेलेन्स्कीले लगाएका छन् । रुसलाई अन्तर्राष्ट्रिय अदालतमा लैजानु पर्ने माग उनले गरे ।
वार्ता भइरहँदा पनि रुसले गोलाबारी नरोकेको बताए । सोमबार बेलारुसमा पाँच घण्टासम्म भएको रुस–युक्रेन वार्तामा सहमति जुट्न भने सकेन । आक्रमण नभएको अवस्थामा मात्रै पारदर्शी वार्ता हुन सक्ने उनले बताए । रुसले लगातार आक्रमण गर्दै आएको छ र निशानामा सर्वसाधारण नागरिक परेका छन् ।
रुसी आक्रमणका कारण लाखौँ युक्रेनी बिस्थापित भएका छन् । डोनेट्स्क क्षेत्रमा रुसी आक्रमणका कारण भएको विनाशका तस्बिर सार्वजनिक भएका छन् । यसैबीच अस्ट्रेलियाले ५० मिलियन डलर बराबरको हतियार युक्रेनलाई सहयोग गर्ने भएको छ ।
पश्चिमा राष्ट्रले सुरक्षा सामग्रीका लागि युक्रेनलाई लगातार सहयोग गर्दै आएका छन् । उनीहरुले रुसमाथि आर्थिकसहितका प्रतिबन्ध लगाएका छन् । यसको प्रभाव रुसी अर्थतन्त्रमा देखिन थालेको छ ।
