८ चैत, काठमाडौँ । यु-१८ साफ महिला च्याम्पियनसिप फुटबलमा नेपाल भारतसँग पुनः पराजित भएको छ ।
पहिलो खेलमा भारतसँग ७–० गोल अन्तर र दोस्रो खेलमा बङ्ग्लादेशसँग ४–२ गोल अन्तरले पराजित भएको नेपाल तेस्रो खेलमा पनि भारतसँग पराजित भएको हो ।
हिजो बेलुकी जमसेदपुरमा भएको खेलमा भारतले नेपाललाई ५–१ गोलले पराजित गर्यो ।
भारतका लागि एस लिन्डा कोमले ह्याट्रिक गरिन् भने हेमाम सिल्की देवी र अनिता कुमारीले एक–एक गोल गरे । नेपालका लागि सन्दिपा भोलानले एक गोल गरिन् ।
नेपालले अब अन्तिम खेल भोलि बङ्ग्लादेशसँग खेल्नेछ । भारत ३ खेलमा ९ अङ्क जोडेर शीर्ष स्थानमा रहेको छ । बङ्ग्लादेश ३ अङ्क जोडेर दोस्रो स्थानमा रहेको छ ।
च्याम्पियनसिपमा नेपाल, भारत र बङ्ग्लादेशको सहभागिता रहेको छ । शीर्ष टोलीले उपाधि जित्नेछ ।
