५ असार, चितवन । नारायणगढ–मुग्लिन सडक खण्डको खहरे खोलामा बसका सहचालक चिप्लिएर बेपत्ता भएका छन् ।
इच्छाकामना गाउँपालिका–५ मा रहेको खहरे खोलामा काठमाण्डौबाट धनगढीका लागि छुटेको ना ६ ख ७४६३ नम्बरको बसका सहचालक राति चिप्लिएर बेपत्ता भएका हुन् ।
कैलालीको गोदावरी नगरपालिका बस्ने ३५ वर्षीय तेजबहादुर बोहरा खहरे खोलामा बेपत्ता भएका जिल्ला प्रहरी कार्यालय चितवनले जनाएको छ ।
राति पहिरोले सडक अवरुद्ध भएका बेला बसबाट झरेर बोहरा खाजा किन्न गएका थिए । त्यही क्रममा खोलामा चिप्लिएर खसेका जिल्ला प्रहरी कार्यालय चितवनका प्रमुख प्रहरी उपरीक्षक नवराज अधिकारीले जानकारी दिए ।
उनका अनुसार बोहराको खोजीका लागि सशस्त्र प्रहरीको गोताखोर परिचालन गरिएको छ । बोहराको टोपी र चप्पल भने भेटिएको छ ।
