२६ साउन, काठमाडौं ।
नेपाल सुपर लिग (एनएसएल) फुटबलको दोस्रो संस्करण असोज २३ गतेदेखि सुरु हुने भएको हो ।अखिल नेपाल फुटबल संघ एन्फाको बिहीबार एन्फा मुख्यालयमा बसेको दोस्रो कार्यसमिति बैठकले फ्रेन्चाइज फुटबल एनएसएलको मिति तय गरेको हो । बैठकले एनएसएल असोज २३ देखि मंसिर २ गतेसम्म गर्ने मिति तय गरेको छ ।
तर त्यसका लागि यसअघि भएको सम्झौतामा केही परिमार्जन गर्नुपर्नेछ । त्यसका लागि कार्यसमिति बैठकले एनएसएल आयोजकसँग छलफल गर्नका लागि अध्यक्ष पंकज विक्रम नेम्वाङको संयोजकत्वमा ७ सदस्यीय समिति गठन गरेको छ ।
समितिले यसअघिको सम्झौताको बुँदामा परिमार्जन लगायत विषयमा काम गर्नेछ । एन्फाको विधि र विधान अनुसार भएको खण्डमा मात्रै एनएसएल गर्ने गरी यो निर्णय गरेको एक सदस्यले जानकारी दिए ।
एन्फाको अघिल्लो कार्यसमितिले २०७९ भदौ २५ देखि कात्तिक ५ सम्म एनएसएलको दोस्रो संस्करणका लागि अनुमति दिएको थियो । तर ६ असारमा पंकज विक्रम नेम्वाङको नेतृत्वमा एन्फामा नयाँ कार्यसमिति आएपछि क्लबहरुसँग छलफल गरेर एनएसएलबारे निर्णय गर्ने अध्यक्ष नेम्वाङले बताएका थिए ।
त्यसपछि एन्फा नेतृत्व र ए डिभिजनका चार क्लबहरुबीच भएको छलफलले एनएसएलको लागि यसअघि गरिएको सम्झौता रद्द गर्नका लागि कार्यसमितिमा सिफारिस गर्ने निर्णय गरेको थियो ।
त्यसै अनुसार कार्यसमितिमा छलफल भएको हो । एनएसएलका लागि छलफल गर्न गठिन समितको अन्य सदस्यमा एन्फा उपाध्यक्ष दीपक खतिवडा र कुमार केसी तथा एन्फा सदस्य टिकाराम लामा, मनिराज विष्ट, रविन्द्र चन्द र पुरुषोत्तम थापा छन् ।
नेपाल स्पोर्ट्स एण्ड इभेन्ट म्यानजेमेन्ट ९एनएसईएम० को आयोजनामा २०७८ वैशाख / जेठमा पहिलो संस्करणको एनएसएल सफलतापूर्वक सम्पन्न भएको थियो ।
२०७८ कै चैतमा दोस्रो संस्करण सुरु गर्ने तयारी भए पनि ए डिभिजन क्लबहरुले आफ्नो खेलाडी सम्झौतामै रहेका बेला एनएसएलका लागि अक्सन गरेपछि यसले विवादको रुप लिएको थियो ।
दोस्रो संस्करणको एनएसएलमा तीन नयाँ टिम थपिनेछन् र कूल १० टिमले प्रतिस्पर्धा गर्नेछन् । जसमा साविक विजेता काठमाडौं रेजर्स एफसी, विराटनगर सिटी एफसी, विरगञ्ज युनाईटेड एफसी, बुटवल लुम्बिनी एफसी, धनगढी एफसी, एफसी चितवन, झापा एफसी, ललितपुर सिटी एफसी र पोखरा थन्डर्स र स्पोर्टिङ इलाम एफसी दि मेची छन् ।
