१२ भदौ ,एजेन्सी ।
आर्थिक तथा राजनीतिक अस्थिरतातर्फ धकेलिरहेको पाकिस्तानको आधाभन्दा धेरै भाग अहिले बाढीको चपेटामा परेको छ । लगातारको भिषण वर्षापछि आएको बाढी र डुबानले त्यहाँ ठूलो जनधनको क्षति भएको छ । लगातारको वर्षापछि आएको बाढीपहिरोले ठूलो मानवीय र भौतिक क्षति निम्त्याएपछि पाकिस्तानमा राष्ट्रिय संकट घोषणा गरिएको छ । पाकिस्तानी सञ्चारमाध्यमहरुका अनुसार बाढीको कारण अहिलेसम्म तीन सय बालबालिका सहित एक हजारभन्दा धेरैको मृत्यु भएको छ ।
सयौं घाइते र हराइरहेका छन । बाढीपहिरोले हालसम्म ४ लाख घरहरू ध्वस्त भएका छन । सरकारी तथ्यांक उल्लेख गर्दै डान अखबारले तीन करोड ३० लाखभन्दा धेरै मानिस बाढीको कारण प्रभावित भएको उल्लेख गरेको छ । सिन्ध, बलुचिस्तान र खैबर पख्तुनख्वाहमा बाढीको असर सबैभन्दा धेरै देखिएको छ । अहिलेसम्म सिन्धमा सबैभन्दा धेरै ३३९ जनाको मृत्यु भएको छ ।
पाकिस्तानका प्रधानमन्त्री शहबाज शरिफले बाढी प्रभावित सिन्धको भ्रमण गरेका छन् र त्यहाँका मानिसहरुको सहयोगका लागि ३८ अर्ब पाकिस्तानी रुपी सहयोगको घोषणा गरेका छन् । सेना प्रमुख जनरल कमर जावेद बाजवाले बलुचिस्तानको भ्रमण गरेका छन् । प्रधानमन्त्री शरिफले बाढीको कारण उत्पन्न परिस्थितिको विषयमा छलफलका लागि सोमबार सर्वदलीय बैठक बोलाएका छन् । पाकिस्तानी सूचनामन्त्री मरियम औरंगजेबले संकटको यो घडीमा राष्ट्रिय एकता कायम गर्दै सबैलाई उद्धार र राहतमा जुट्न आग्रह गरेकी छन ।
बाढीपहिरो प्रभावित क्षेत्रमा खटिएर पीडितहरूलाई जतिसक्दो चाँडो उद्धार गर्नुपर्ने भन्दै उनले यसमा सघाउन अन्तर्राष्ट्रिय समुदायलाई समेत गुहारेकी छन । बाढीपहिरोले सडक, पुल र सञ्चारसम्बन्धी पूर्वाधारमा बढी क्षति पुगेको छ । ‘घरबारविहीन भएका हजारौं परिवारलाई आवास मात्र होइन, अहिले बिहान–बेलुका खानाकै पनि समस्या हुन थालेको छ । सरकारले बाढीपहिरो प्रभावितका लागि तत्काल राहत पु¥याउन ७२ अर्ब ३६ करोड पाकिस्तानी रूपी आवश्यक पर्ने जनाएको छ ।
सरकारको प्रारम्भिक मूल्यांकन रिपोर्टअनुसार खाद्यान्न र नगद राहत दिनका लागि मात्रै ७ अर्ब ३३ करोड रूपी आवश्यक पर्नेछ । खाद्यान्नबाहेकका राहत सामग्री जुटाउन ८ अर्ब ७१ करोड र स्वास्थ्य सामग्रीमा १ अर्ब ६२ करोड रूपी आवश्यक पर्ने आकलन गरिएको छ । स्थानीय किसानले पालेका हजारौं गाईवस्तु बाढीले बगाएको छ । उक्त क्षति पूर्ति गर्न मात्रै ९ अर्ब २ करोड रूपीभन्दा बढी खर्च हुने अनुमान छ ।
मेसिन तथा उपकरण खरिदमा ४ करोड ६४ लाख खर्च हुने प्रारम्भिक मूल्यांकन गरिएको छ । सामान्यतः पाकिस्तानमा मनसुन वर्षमा ३÷४ चरणसम्म सक्रिय रहन्छ । तर, अहिले आठौं चरणको वर्षा भएको जलवायुमन्त्री रहमानको भनाइ छ । मुलुकभर सामान्यतः ४८ मिलिमिटर वर्षा हुने गरेकोमा अहिले १६६.८ मिलिमिटर भइसकेको छ ।
जुन सामान्य अवस्थाको भन्दा २४१ प्रतिशतले बढी हो । अप्रत्याशित रूपमा भएको वर्षाले निम्त्याएको बाढीपहिरोले सिन्धका २३ जिल्लालाई तहसनहस गरेको छ । मौसमी वर्षापछिको बाढीपहिरो र डुबानका कारण सन् २०१० मा पनि पाकिस्तानमा व्यापक क्षति भएको थियो ।
