२४ असोज, एजेन्सी ।
आफैले सन २०१८ मा उद्घाटन गरेको रुसलाई क्राइमियासंग जोड्ने पुल युक्रेनले ध्वस्त बनाइदिएपछि रुसी राष्ट्रपति आगो भएका छन् । यस कार्यका लागि उनले युक्रेनलाई आतंकबादी घोषित गरेका छन् भने रुसले आज विहानैबाट राजधानी किभमा दर्जनौ क्षेप्यास्त्र आक्रमण गरेको छ ।
किएभमा सोमवार बिहानै भएका धेरैवटा विस्फोटनमा कैयौँ मानिसहरूको मृत्यु हुनुका साथै घाइते भएको युक्रेनी आपत्कालिन सेवाहरूले जनाएका छन । रुसले सोमबार युक्रेनी राजधानीसंगै मुख्य–मुख्य सहरमा दर्जनौँ क्षेप्यास्त्र आक्रमण गरेको छ । बीबीसीका अनुसार सोमबार बिहानैदेखि रुसले कम्तीमा ७५ वटा क्षेप्यास्त्र आक्रमण गरेको हो ।
युक्रेनका सेना प्रमुख जनरल भ्यालेरी जालुझिनीले एकाबिहानैदेखि उक्त संख्यामा क्षेप्यास्त्र प्रहार भएको बताएका छन् । उनले ट्विट गर्दै तीमध्ये ४१ वटा क्षेप्यास्त्र युक्रेनको हवाइ प्रतिरक्षामार्फत निष्प्रभावी तुल्याइएको दाबी गरेका छन् । राजधानी सहर किभ, निप्रो, जापोरिझिया, खर्किभ, तेर्नपिल, लिभिभमा क्षेप्यास्त्र आक्रमण गरिएको छ ।
किभमा भएको आक्रमणमा कम्तीमा ८ जना नागरिक मारिएको र २४ जना घाइते भएको युक्रेनका गृहमन्त्रीले बताएका छन् । महत्वपूर्ण भौतिक पूर्वाधारमा क्षेप्यास्त्र आक्रमण भएको किभका मेयरले बताएका छन् । युक्रेनका राष्ट्रपति भोलोदिमिर जेलेन्स्कीले पनि निप्रो, जापोरिझियालगायतमा रुसले क्षेप्यास्त्र प्रहार गरेको बताएका छन् ।
त्यस्तै खर्किभका मेयरले सहरमा रुसले ऊर्जा पूर्वाधारमा क्षेप्यास्त्र हानेको बताएका छन् । यसले विद्युत् आपूर्ति बन्द भएको छ भने पानीको पनि समस्या देखिएको छ । त्यसैगरी तेर्नपिल र लिभिभमा पनि क्षेप्यास्त्र आक्रमणबाट विद्युत् आपूर्ति बन्द भएको छ । यता समी, झिटोमिर, खेमेल्नित्स्की र किरोभोरादमा पनि ठूला विस्फोटन सुनिएका छन्।
रुसले पछिल्लो आक्रमणबारे केही बताइसकेको छैन। कतिवटा मिसाइल आक्रमण भएको भन्ने स्वतन्त्र पुष्टि हुन बाँकी रहेको बीबीसीले उल्लेख गरेको छ । ती विस्फोटनहरू युक्रेन युद्धको सुरुमा भएका रुसी हवाई हमलामा भन्दा निकै धेरै केन्द्र भागमा सोझिएका देखिन्छन् ।
यी हमलाहरू रुसको अधीनस्थ क्राइमियासँग जोडिने एकमात्र पुलमा विस्फोटन भएर क्षति भएको दुई दिनपछि भएको हो । सामाजिक सञ्जालमा राखिएका तस्बिर तथा भिडिओहरूमा किएभको कैयौँ भागहरूबाट धुवाँको मुस्लो उडिरहेको देखिन्छ ।
किभमा हवाई हमलाको पूर्वजानकारी दिने साइरनहरू झण्डै ९० मिनेट अघि बजेका थिए । सोमवार बिहान युक्रेनभर भएका हवाई हमलाहरूबारे प्रतिक्रिया दिर्दै युक्रेनी राष्ट्रपति भोलोदिमिर जेलेन्स्कीले रुसले “संसारबाट हाम्रो नामनिसान मेटाउन चाहेको“ बताएका छन् ।
