५ मंसिर , एजेन्सी ।
कतार विश्वकपको समूह ‘बी’मा रहेको इंग्ल्यान्डले आज इरानविरुद्ध खेल्दै विश्वकपको सुरुआत गर्दै छ । समूह बी को यो पहिलो खेल हो । खेल नेपाली समयअनुसार साँझ ६ः४५ बजे खलिफा अन्तर्राष्ट्रिय रंगशाला हुनेछ । विश्वकपमा हालसम्म ६९ खेल खेलिसकेको इंग्ल्यान्डले दोस्रो पटक एसियाली राष्ट्रको सामना गर्दैछ ।
यसअघि १९८२ को समूह चरणमा कुवेतलाई १–० ले पराजित गरेयता टोलीले एसियाली राष्ट्रको सामना गरेको छैन । यस्तै अर्को रमाइलो पक्ष भनेको इंग्ल्याण्ड र इरान पहिलो पटक अन्तर्राष्ट्रिय फुटबलमा आमने सामने हुन लागेका हुन् । यसअघि रुसमा भएको विश्वकपमा सेमिफाइनलसम्म पुगेको इंग्ल्याण्ड कतार विश्वकपमा सुखद सुरुवात गर्ने लक्ष्यमा छ ।
गत वर्ष भएको युरोफकपमा भने इंग्ल्याण्ड फाइनलमा पराजित भएको थियो । इंग्ल्यान्डले पछिल्लो ७ सहभागितामा एक पटक मात्र उद्घाटन खेलमा हार बेहोरेको छ । त्यसबाहेक ३ खेलमा जित र ३ खेल बराबरीमा सकिएको छ । ग्यारेथ साउथगेटको टिम इरान विरुद्ध ३ अंक जोड्नेमा विश्वस्त छ । तर इरानले उनीहरुलाई चुनौती दिन सक्नेछ ।
इरानले भने पछिल्लो दुवै विश्वकपमा सुरुवाती खेलमा गोल खाएको छैन । इरानका प्रशिक्षक कार्लोस क्वेरोज चौथो पटक विश्वकपमा टोलीको जिम्मेवारी सम्हाल्दैछन् । सन् २०१० मा पोर्चुगलको टोली हेरेका उनी पछिल्लो तीन संस्करणमा भने इरानसँग रहेका छन् । इरानले हालसम्म विश्वकपमा १५ खेल खेल्दा २ जित, ४ बराबरी र ९ हारको नतिजा निकालेको छ ।
इरानले विश्वकपको एकै खेलमा २ गोलभन्दा बढी गर्न सकेको छैन । यता इंग्ल्यान्डका कप्तान ह्यारी केन अन्तर्राष्ट्रिय फुटबलमा इंग्ल्यान्डको लागि सर्वाधिक गोलकर्ता बन्ने इतिहास रच्नबाट २ गोल टाढा छन् । केनले वाइन रुनीको नाममा रहेको इंग्ल्यान्डबाट सबैभन्दा धेरै गोल गर्ने खेलाडीको कीर्तिमान आफूले ‘सकेसम्म चाँडो’ तोड्ने बताएका छन् ।
चार वर्षअघि रुसमा इंग्ल्यान्डले विश्वकपको सेमिफाइनलसम्मको यात्रा तय गर्दा केनले ६ गोल गर्दै ‘गोल्डेन बुट’ जितेका थिए । रुनीको नाममा रहेको उच्च गोलकर्ताको कीर्तिमान तोड्न केन दुई गोलले मात्र पछि छन् । इंग्ल्यान्डका उच्च गोलकर्ता रुनीले ५३ गोल गरेका छन् । उनलाई पछ्याइरहेका केनले ५१ गोल गरेका छन् ।
सन् २०१८ मा इंग्ल्यान्डबाट सन्न्यासको घोषणा गरेका रुनीले १२० अन्तर्राष्ट्रिय खेल खेलेका थिए । “यो कीर्तिमान चाँडै नै तोड्छु भन्नेमा आशावादी छु,” इंग्ल्यान्डबाट ७५ अन्तर्राष्ट्रिय खेल खेलेका केनले भने, “म यो कीर्तिमानको लागि नजिक छु र यसको बारेमा समर्थकहरूले कुरा गर्छन् भन्नेबारे मलाई थाहा छ । तर, म आफ्नो खेलमा मात्र केन्द्रित हुन चाहन्छु ।”
२९ वर्षीय केनले सन् २०१५ मा इंग्ल्यान्डबाट ‘डेब्यु’ गरेका थिए । आज नै हुने समूह ‘ए’ को खेलमा सनेगलले नेदरल्यान्ड्सँग भिड्दै छ । दुई टोलीबीचको खेल नेपाली समय अनुसार राति ९ः४५ मा सुरु हुनेछ । समूह ‘बी’ अन्तर्गतको अर्को खेलमा अमेरिका र वेल्सबीच प्रतिस्पर्धा हुनेछ । अमेरिका र वेल्सबीचको खेल राति १२ः४५ बजे सुरु हुनेछ ।
