विराटनगर,भदौ ११
वर्षभरि दिवंगत भएका आफन्तहरुको मोक्षको कामनासहित नेवार समुदायले मनाउने गाइजात्रा पर्व सुरु भएको छ । यसै अवसरमा विराटनगरस्थित झीः पुचबाट झांकी सहितको गाइजात्रा ¥याली निकालिएको छ । यसपटक २१ परिवार झी पुचबाट निकालिएको गाइजात्रामा सहभागि भएका छन् ।
बंगलामुखी मन्दिर परिसरबाट निकालिएको गाइजात्रा ¥यालीले ट्राफिकचोकबाट मेनरोडको विभिन्न भागको परिक्रमा गर्दै तिनपैनीस्थित श्रीराधाकृष्ण मन्दिर परिसरमा पुगेर समापन भएको थियो । गाईजात्रामा वर्षभरि दिवङ्गत भएका आफन्तको सम्झनामा गाई वा मानिसलाई गाईका रुपमा सिंगारी नगर परिक्रमा गराउने प्रचलन रहेको छ ।
दिवंगत आत्मालाई वैतरणी तर्न सजिलो होस् भनेर विशेषगरी नेवार समुदायले यो पर्व मनाउँछन् । भाद्र कृष्णअष्टमीका दिनसम्म मनाइने गाईजात्राका क्रममा प्रहसन र सामाजिक विकृतिहरुप्रति व्यङ्ग्यात्मक प्रदर्शन, नाचगान तथा मृत व्यक्तिको सम्झनामा रामायणका श्लोकहरु पनि गाइन्छन् ।
