१४ पौष, एजेन्सी ।
फ्रान्सेली फरवार्ड किलीयन एमबाप्पेले फिफा विश्वकप कतार २०२२ उपाधि जितेको खुसियाली मनाउने क्रममा अर्जेन्टिनी गोलरक्षक एमिलियानो मार्टिनेजले देखाएको खुसियाली मनाउने शैलीप्रति आफ्नो प्रतिक्रिया दिएका छन् । बुधबार फ्रान्सेली लिग वनमा स्ट्रासबर्गविरुद्ध खेलपछि बोल्दै एमबाप्पेले मार्टिनेजको खुशीयाली मनाउने शैलीबारे आफ्नो प्रतिक्रिया दिएका हुन् ।
उनले भने, ‘कसले कस्तो खुशीयाली मनायो मलाई मतलब हुँदैन । म यस्तो कुरामा ध्यान दिन पनि चाहन्न ।’ एमबाप्पेले खेलपछि मेसीलाई भने बधाई दिएको बताए । ‘मैले मेसीलाई बधाई दिएँ । यो उपाधि उनको लागि निकै महत्त्वपूर्ण थियो । मेरो लागि पनि उत्तिकै महत्त्व बोकेको थियो, तर हामी पराजित भयौं । जितेको टोलीलाई बधाई दिनु परिपक्व खेलाडीको पहिचान हो ।’
एमबाप्पेले सन् २०२२ को फिफा विश्वकपको फाइनलमा अर्जेन्टिनासँगको हार आफूले कहिल्यै भुल्न नसक्ने स्वीकार गरेका छन्। विश्वकपको फाइनलमा अर्जेन्टिनाविरुद्धको खेलमा सनसनीपूर्ण ह्याट्रिक गरे पनि एमबाप्पेले हार बेहोरेका थिए। विश्वकपको फाइनलमा हारेको १० दिनपछि एमबाप्पेले ९६औं मिनेटमा पेनाल्टीमार्फत आफ्नो टोलीलाई बचाउँदै पीएसजीका लागि विजयी सुरुवात गरेका छन्।
खेलपछि उनलाई विश्वकपको फाइनलमा अर्जेन्टिनासँगको हारको बारेमा टिप्पणी गर्न भनियो। “मलाई लाग्छ कि म यसलाई कहिल्यै पार गर्न सक्दिन,” एमबाप्पेले पत्रकारहरूलाई भनेका छन् । पूर्व मोनाको स्टारले फ्रान्सको हारको कारणले पीएसजीलाई असर गर्नु नहुने र आफू विजयी बाटोमा फर्कन पाउँदा खुसी भएको बताएका छन्।
“मैले मेरो टोलीका साथीहरूलाई भनें, राष्ट्रिय टोलीको असफलताको लागि क्लबले मूल्य तिर्नु पर्ने कुनै कारण छैन, तिनीहरू दुई धेरै फरक परिस्थितिहरू हुन्,” उनले भनेका छन् । तेस्रोपटक विश्वकप विजेता बनेपछि अर्जेन्टिनाले घरेलु भुमिमा लाखौं समर्थकमाझ विजयी र्यालीमा खुसी मनाउने क्रममा अर्जेन्टिनाका गोलरक्षक एमिलियानो मार्टिनेजले आफूलाई फाइनलमा पेनाल्टीसहित ४ गोल गरेका फ्रान्सेली फरवार्ड किलियन एमबाप्पेलाई लगातार व्यंग्य गरेका थिए ।
फाइनलअघि एमबाप्पेले दक्षिण अमेरिकी फुटबल युरोपजति राम्रो नरहेको बताएपछि मार्टिनेजले एमबाप्पेलाई ‘बच्चो’ भनेर कटाक्ष गरेका थिए । एम्बापपेको फाइनलअघि दक्षिण अमेरिकी फुटबल कमजोर छ भन्ने प्रतिक्रियामा मार्टिनेज खुसी थिएनन् ।
त्यसैले फाइनलपछि दक्षिण अमेरिकामा लगातार एमबाप्पेको आलोचना भएको थियो । एमबाप्पेलाई लक्षित गर्दै खेलपछि ड्रेसिङ रुममा मार्टिनेजले नारा लगाएको भिडियो पनि सामाजिक संजालमा देखियो । अझ र्यालीमा विश्वकपको ट्रफी बोकेर शहर परिक्रममा गर्ने क्रममा मार्टिनेजले एमबाप्पेको कार्टुन बोकेको विषयले पनि चर्चा पाएको थियो ।
